پاکستان میں مقامی طور پر موبائل فون بنانے کی پالیسی ناکام
اسلام آباد(یواین پی) گزشتہ مالی سال میں 46 ارب روپے سے زائد ٹیکس مراعات دینے کے باوجود میک ان پاکستان موبائل فونز کا خواب پورا ہو گیا کیونکہ حکومت ریاستی پالیسی کی خلاف ورزی کرتے ہوئے موبائل ہینڈ سیٹس کی تیاری کو مقامی بنانے میں ناکام رہی ہے۔ذرائع نے میڈیا کو بتایا کہ ای ڈی بی اور وزارت صنعت موبائل فونز کی تیاری میں استعمال ہونے والے آلات اور مواد کے ایک سال سے دو سال کے لوکلائزیشن پلان کو یقینی بنانے میں ناکام رہے ہیں۔تین سال قبل گزشتہ حکومت نے میک ان پاکستان موبائل فونز کو فروغ دینے کے لیے موبائل ڈیوائس مینوفیکچرنگ پالیسی کی منظوری دی تھی۔ اس نے ڈیوٹیوں، سیلز ٹیکس اور انکم ٹیکس کی شرحوں کو کم کرنے یا معاف کرنے کی شکل میں مراعات دیں جس کا مقصد مینوفیکچررز کو مقامی طور پر پرزے بنانے کی ترغیب دینا تھا۔ایف بی آر کی 2021-22 کی ٹیکس اخراجات کی رپورٹ سے پتہ چلتا ہے کہ موبائل فون مینوفیکچررز سے وصول کیے جانے والی ڈیوٹیوں اور ٹیکسوں میں کمی کی وجہ سے ملک کو 46.2 بلین روپے کا نقصان اٹھانا پڑا۔
ان مراعات سے فائدہ اٹھانے کے باوجود موبائل فون مینوفیکچررز جون 2022 کی مقررہ تاریخ تک پیکیجنگ مواد کی لوکلائزیشن کو بھی یقینی نہیں بنا سکے جو کہ ویلیو چین میں سب سے آسان کام ہے۔
