مردم شماری پر تحفظات دور کرنے کیلئے صوبوں کو 12ارب کے فنڈز جاری
اسلام آباد (آئی این پی ) مردم شماری پر تحفظات دور کرنے کیلئے صوبوں کو فنڈز جاری۔ ترجمان ادارہ شماریات سرور گوندل کے مطابق 12 ارب روپے کے فنڈز کا اجرا ءکر دیا گیا، تمام صوبوں کو مردم شماری کے انتظامات کیلئے فنڈز کی دوسری قسط کا اجراءکیا گیا ہے۔ مردم شماری میں صوبوں کو تین مراحل میں پیسوں کا اجرا ءکیا گیا جس میں لاجسٹک انتظامات یعنی ہائرنگ آف وہیکلز، ٹریننگ چارجز اور ریمونریشن چارجز کیلئے پیسوں کا اجرا ءکیا جا رہا ہے۔ اس مد میں صوبہ سندھ کو 92 کروڑ 89 ہزار روپے کا ہائرنگ آف وہیکلز کی مد میں اجراءکیا جا رہا ہے، اسی طرح بلوچستان کو 43 کروڑ روپے کا اجرائ، خیبر پختونخوا کو تقریبا ً64 کروڑ 24 لاکھ 60 ہزار کا اجراءکیا جا رہا ہے جبکہ پنجاب کو بھی کل تک 1 ارب 88 کروڑ 24 لاکھ 75 ہزار روپے کا اجرا ءکر دیا جائے گا۔ مردم شماری کے عمل کی شفافیت اور منظم مانیٹرنگ کیلئے چیف سیکرٹریز، ڈپٹی کمشنرز اور اسسٹنٹ کمشنرز کو مانیٹرنگ ڈیش بورڈز کی رسائی دے دی گئی۔ مانیٹرنگ ڈیش بورڈز کے ذریعے بلاک لیول تک آبادی، گھرانے، جیو ٹیگنگ کے ساتھ کوریج کی کارکردگی اور شمار کنندہ کے کام کی کارکردگی دیکھی جا سکتی ہے جو کہ کسی بھی صورت پہلے ممکن نہ تھی۔
فنڈز جاری
