ڈبلیو ڈبلیو ای شائقین کے لئے انتہائی افسوسناک خبر آ گئی، معروف ریسلر ساحل سمندر میں نہاتے ہوئے لاپتا
لاس اینجلس(ڈیلی پاکستان آن لائن)معروف ڈبلیو ڈبلیو ای ریسلر شاڈ گیسپارڈ ساحل سمندر میں نہاتے ہوئے لاپتہ ہو گئے۔
غیر ملکی میڈیا کے مطابق سابق ڈبلیو ڈبلیو ای سٹار شاڈ گیسپارڈ مرینہ ڈیل رے میں بحرالکاہل میں تیراکی کرتے ہوئے سمندر کی بے رحم موجوں کا شکار ہو کر لاپتہ ہوگئے۔لاس اینجلس کاؤنٹی فائر ڈپارٹمنٹ لائف گارڈ ڈویژن کا کہنا ہے شاڈ گیسپارڈ اپنےبیٹےکےہمراہ سمندر میں نہاتےہوئےگہرے پانی میں چلے گئے، لائف گارڈز گیسپارڈ کے بیٹے کو بچانے میں کامیاب رہے لیکن سابق ریسلر بے رحم موجوں کا شکار ہوگئے۔لائف گارڈ ڈویژن کا کہنا تھا کہ شاڈ گیسپارڈ کی تلاش کے لیے فوری طور پر ریسکیو کشتیاں طلب کی گئیں، غوطہ خوروں اور ہیلی کاپٹروں کے ذریعے سابق ریسلر کو تلاش کرنے کی کوشش کی گئی لیکن شام ساڑھے سات بجے تلاشی کا عمل روک دیا گیا۔لاس اینجلس کاؤنٹی فائر ڈپارٹمنٹ لائف گارڈ ڈویژن کی میرین ٹیکنیکل سرچ ٹیم نے اگلے روز مقامی وقت کے مطابق صبح 7 بجے ایک بار پھر تلاشی کا عمل شروع کیا لیکن انہیں کامیابی نہ مل سکی۔
واضح رہے کہ شاڈ گیسپارڈ 2003 سے 2007 اور پھر 2008 سے 2010 تک ڈبلیو ڈبلیو ای سے وابستہ رہے لیکن وہ دسمبر 2016 میں اس وقت خبروں کی زینت بنے جب انہوں نے فلوریڈا کے ایک سٹور میں مسلح ڈکیتی کو ناکام بنایا۔
