نیب کو سیاست نہیں احتساب کرنا چاہیے،فرسودہ نظام دفن کرنے کیلئے نوجوانوں کو آگے آنا ہوگا:سراج الحق

نیب کو سیاست نہیں احتساب کرنا چاہیے،فرسودہ نظام دفن کرنے کیلئے نوجوانوں کو ...

  



لاہور(نمائندہ خصوصی) امیر جماعت اسلامی پاکستان سینیٹر سراج الحق نے کہا کہ حکومت اور اپوزیشن نے شفاف الیکشن آئین کی بالادستی اور عدلیہ کی خود مختاری پر مکالمہ شروع نہ کیا تو وقت ہاتھ سے نکل جائے گا۔موجودہ حکومت بھی سابقہ حکومتوں کی غلط پالیسوں کو آگے بڑھا رہی ہے۔حکومت اور اپوزیشن میں شامل پانامہ کے ملزمان کا احتساب اس لیے نہیں ہورہا کہ وہ بااثر لو گ ہیں۔نیب کو سیاست کی بجائے احتساب کرنا چاہیے۔ان خیالات کا اظہار انہوں نے باجوڑ میں قبائلی جرگہ سے خطاب کرتے ہوئے کیا۔اس موقع پر سابق رکن قومی اسمبلی صاحبزادہ ہارون الرشید و دیگر بھی موجود تھے۔سینیٹر سراج الحق نے کہا کہ ملک کی سیاست نظام کی بجائے شخصیات کے گرد گھومتی ہے۔بااثر سیاسی شخصیات خود کو آئین و قانون سے بالاتر سمجھتی ہیں اس لیے بڑے بڑے مگر مچھ احتساب کے شکنجے میں نہیں آتے۔انہوں نے کہا کہ پاکستان کے لیے قربانیاں ہمیشہ غریبوں نے دی ہیں اور امیروں نے ان کا پھل کھایا ہے۔عوام دینے والے اور حکمران ہڑپ کرنے والے ہیں۔ا س فرسودہ سیاست کو ہمیشہ کے لیے دفن کرنے اور اس کی جڑیں کاٹنے کے لیے نوجوانوں کو آگے آنا چاہیے۔انہوں نے کہا کہ نوجوان قوم کی امیدوں کا مرکز ہیں۔سینیٹر سراج الحق نے کہا کہ ملکی تاریخ میں اتنی جلدی کوئی حکومت غیر مقبول نہیں ہوئی جتنی پی ٹی آئی کی حکومت ہوئی ہے۔پی ٹی آئی حکومت کے خلاف عوام کی نفرت اور مایوسی میں دن بدن اضافہ ہورہا ہے۔حکومت نے سب سے زیادہ مایوس نوجوانوں کو کیا ہے۔اب یہی نوجوان حکمرانوں کے سارے حساب بے باک کریں گے۔انہوں نے کہا کہ بے زورگاری اور مہنگائی کے مارے عوام صبح و شام حکومت کو کوستے سنائی دیتے ہیں مگر عوام کی چیخیں اور دہائی حکمرانوں پر کوئی اثر نہیں کررہی۔لگتا ہے حکمران اندھے اور بہرے ہوچکے ہیں جنہیں کچھ سنائی اور دکھائی نہیں دے رہا۔سینیٹر سراج الحق نے کہا کہ حکومتی حلقوں میں بھی ایک بے چینی دکھائی دے رہی ہے۔اس بے چینی کا واحد علاج اپوزیشن کے ساتھ مل بیٹھنے اور ملک کو موجودہ صورتحال سے نکالنے میں ہے۔حکومت کو آئین کی بالادستی،قانون کی حاکمیت اور کرپشن کے مکمل خاتمہ کے لیے تمام مصلحتوں کو بالائے طاق رکھتے ہوئے آگے بڑھنا ہوگا۔اگر حکومت واقعی احتساب کے نظام کو موثر بنانا چاہتی ہے تو سب سے پہلے خود کو احتساب کے لیے پیش کرناہوگا۔

سراج الحق 

مزید : صفحہ آخر