گورنرسندھ عمران اسماعیل سے اٹلی کی قونصل جنرل کی ملاقات

گورنرسندھ عمران اسماعیل سے اٹلی کی قونصل جنرل کی ملاقات

  



کراچی(اسٹاف رپورٹر)گورنرسندھ عمران اسماعیل سے اٹلی کی قونصل جنرل Ms. Anna Ruffinoنے گورنرہاؤس میں ملاقات کی۔ملاقات میں سیاحت کے شعبے میں سرمایہ کاری سمیت اہمیت کے حامل دیگر امور پر تفصیلی تبادلہ خیال کیا گیا۔ اس موقع پر اٹلی کے مشہور شیف Mr. Vittorio Castellani بھی موجود تھے۔ملاقات میں اٹلی کے شیف نے پاکستانی کھانوں کی تعریف کی جبکہ گورنر سندھ نے کہا کہ اٹلی کے کھانوں کو پاکستان میں بہت پسند کیا جاتا ہے۔ شیف نے مزید کہا کہ پاکستان کے سوفٹ امیج کو اجاگر کرنے کے لئے ڈاکومنٹری بنارہا ہوں جس میں کھانے، ثقافت، رسومات اور دیگر مثبت سرگرمیاں کو پیش کیا جائے گا۔ اس موقع پر گورنرسندھ نے کہا کہ پاکستان سیاحت کے لحاظ سے دنیا بھر میں منفرد اہمیت کا حامل ہے یہاں پر چار موسم، بلند ترین پہاڑی مقامات، صحرا،ریگستان، خوبصورت میدانی علاقے با لخصوص پہاڑی سلسلے انتہائی پر کشش اور خوبصورت ترین ہیں جو سیاحت کے شعبہ میں ضروری ہوتے ہیں۔ انہوں نے مزید کہا کہ پاکستان میں سیاحت سمیت دیگر شعبوں میں سرمایہ کاری کے وافر مواقع موجود ہیں سیاحت میں سرمایہ کاری کے فوری اور متوقع سے بڑھ کر نتائج کا حصول یقینی ہے اس ضمن میں بین الاقوامی سرمایہ کاروں کے لیے ویزے سمیت دیگر سہولیات فراہم کی جارہی ہیں۔ قونصل جنر ل نے گورنرہاؤس میں بابائے قوم قائد اعظم محمد علی جناح ؒ کے زیر استعمال کمرہ اور اشیاء کا جائزہ جبکہ ان سے متعلق معلومات حاصل کیں۔

مزید : صفحہ آخر