موت کی جھوٹی خبریں وائرل ہونے پر خود چاچا کرکٹ بھی میدان میں آگئے
لاہور (ویب ڈیسک) پاکستان میں کرکٹ کے سب سے بڑے شوقین صوفی عبدالجلیل المعروف چاچا کرکٹ نے اپنی موت سے متعلق خبروں کی تردید کردی ہے۔
سوشل میڈیا پر خبریں زیرگردش تھیں کہ چاچا کرکٹ انتقال کر گئے ہیں، اس کے جواب میں انہوں نے ایک ویڈیو پیغام ریکارڈ کیا اور کہا کہ وہ زندہ اور صحتمند ہیں۔
Super Exclusive: Chacha Cricket’s Message to Crickter Lovers. @TheRealPCB @geonews_urdu pic.twitter.com/z5MEbKejT7
— Zahid Gishkori (@ZahidGishkori) November 18, 2020
چاچا کرکٹ کی موت سے متعلق افواہوں نے اس وقت جنم لیا جب پاکستان کرکٹ بورڈ نے ہیڈ کیوریٹر حاجی بشیر کی ہارٹ اٹیک سے انتقال کی خبر شیئر کی۔
پی سی بی نے اپنے ٹوئٹ میں حاجی بشیر کی تصویر بھی منسلک کی جسے لوگ چاچا کرکٹ سمجھ بیٹھے اور یوں ان کے موت کی افواہیں گردش کرنے لگیں۔
انہوں نے اپنے ویڈیو پیغام میں کہا کہ موت برحق ہے اور سب کو ایک نہ ایک دن آنی ہے۔
چاچا کرکٹ نے کہا کہ جس نے بھی میری موت سے متعلق افواہ پھیلائی ہے اللہ اسے ہدایت دے۔
خیال رہے کہ چاچا کرکٹ گزشتہ 50 سال سے کرکٹ سے وابستہ ہیں، شائقین کرکٹ کی بات کی جائے تو چاچا کرکٹ کا نام اول نمبر پر آتا ہے۔
