شمالی وزیرستان میں سکیورٹی فورسز کے آپریشن میں 4 دہشتگرد مارے گئے
ڈیلی پاکستان آن لائن (ڈیلی پاکستان آن لائن) شمالی وزیرستان میں سیکیورٹی فورسز نے خفیہ اطلاع پر آپریشن کیا، جس کے دوران فائرنگ کے تبادلے میں 4 دہشتگرد ہلاک کردیے گئے۔
پاک فوج کے شعبہ تعلقات عامہ کے مطابق شمالی وزیرستان کے علاقے خیصور میں آپریشن کے دوران مارے جانے والے دہشتگردوں میں ہائی ویلیو ٹارگٹ ابراہیم موسیٰ بھی شامل ہے جو دہشتگردوں کا سرغنہ تھا، سیکیورٹی فورسز نے مؤثر طریقے سے دہشتگردوں کے ٹھکانے کا پتا لگایا۔ترجمان پاک فوج کے مطابق دہشتگردوں کا سرغنہ ابراہیم موسیٰ قانون نافذ کرنے والے اداروں کو انتہائی مطلوب تھا۔
آئی ایس پی آر کا کہنا ہے کہ ہلاک دہشتگردوں سے اسلحہ، گولہ بارود اور دھماکا خیز مواد بھی برآمد ہوا ہے۔ ہلاک دہشتگرد دہشتگردی کی متعدد کارروائیوں میں ملوث تھے، علاقے میں موجود دیگر دہشتگردوں کے خاتمے کےلیے کلیئرنس آپریشن جاری ہے۔
