انسداد سموگ کارروائیاں،9972گاڑیوں کے چالان،196صنعتی یونٹس 99بھٹے سیل
لاہور(سٹی رپورٹر)کمشنر لاہور محمد علی رندھاوا کی ہدایات پر لاہور سمیت پوری ڈویژن میں انسداد سموگ احکامات کی خلاف ورزی پر کاروائیاں جاری ہیں۔ لاہور ڈویژن میں 21اکتوبر 2023 سے ابتک 18نومبر 2023 تک کاروائیوں کی جاری رپورٹ کے مطابق فصلوں کی باقیات جلانے پر 362 مقدمات درج،67لاکھ روپے جرمانہ کیا گیااور 2373نوٹس جاری کئے گئے جبکہ 1265 کسانوں سے حلفیہ بیان لیے گئے۔27 روز میں دھواں چھوڑنے والی 9972 گاڑیوں کے چالان کرکے 2 کروڑ روپے جرمانہ اور 3809گاڑیوں کو بند کیا گیا۔ یہ کارروائیاں ایکسائز، ٹریفک اور ٹرانسپورٹ کی ٹیموں نے ناکے لگا کر متفرق چیکنگ اور جنرل ہولڈ اپ کے دوران کیں۔ اسی طرح لاہور ڈویژن میں کل 1828صنعتی یونٹس کو چیک کیا گیا جس میں ایمشن کنٹرول سسٹم کی خلاف ورزی پر 196صنعتی یونٹس سیل ، 56کیخلاف مقدمات درج کئے گئے جبکہ 54لاکھ روپے جرمانہ عائد کیا گیا۔ زگ زیگ خلاف ورزی پر 98بھٹوں پر مقدمات درج ، 99 بھٹوں کو سیل کرکے17لاکھ روپے جرمانہ کیا گیا۔ دوسری جانب پورے شہر میں ایل ڈبلیو ایم سی، واسا، ایم سی ایل کی مسٹ گاڑیوں سے پانی کا چھڑکاو دن اور رات کے وقت جاری رکھا ہوا ہے۔ لاہور سمیت پوری ڈویژن کے کل 51پائرولسز پلانٹس مکمل طور پر سیل اور بند ہیں۔ بند پلانٹس کی مانیٹرنگ کی جارہی ہے۔ 21اکتوبر سے ابتک کوڑا کرکٹ، گرین ویسٹ کو آگ لگانے پر پابندی کی خلاف ورزی پر بھی کاروائیاں کی گئیں۔ لاہور ڈویژن کے 9موٹروے اسکوڈز نے 2061 انسپکشنز کیں۔ 194 جگہ پر خلاف ورزی پائی گئی۔ لاہور تا شیخوپورہ اور لاہور تا ننکانہ موٹروے اسکواڈز نے 65مقدمات درج کرائے اور 24لاکھ 50ہزار روپے جرمانہ کیا گیا۔
