کراچی : اسکول کی طالبہ ٹرک کے نیچے آکر جاں بحق
کراچی(اسٹاف رپورٹر)شہر قائد میں ٹریفک حادثات اور ان میں اموات بد قسمتی سے معمول بن گئی ہیں،گزشتہ روز اسکول جانے والی طالبہ ٹرک کے نیچے آکر جاں بحق ہوگئی۔تفصیلات کے مطابق یہ ٹریفک حادثہ کراچی کے بلدیہ 9 نمبر میں پیش آیا جہاں والد کے ہمراہ اسکول جانے والی طالبہ ٹرک تلے آکر جاں بحق ہوگئی۔پولیس حکام کے مطابق جاں بحق ہونے والی بچی اپنے والد کے ہمراہ اسکول جارہی تھی، والد بچی کو چیز دلوانے جنرل اسٹور پر رکا تو بچی موٹرسائیکل پر بیٹھی تھی۔پولیس نے بتایا کہ قریب سے گزرنے والے بچوں کی شرارت سے موٹر سائیکل گری، موٹر سائیکل کے ساتھ سڑک پر گرنے والی بچی ٹرک کی زد میں آگئی۔پولیس حکام کے مطابق اس حادثے کے بعد ٹرک ڈرائیور فرار ہوگیا جس کو تلاش کیا جارہا ہے۔
