شارع فیصل تھانے آنے والے شہری کو اغواء کرنے کے بعد لوٹ لیا گیا

کراچی (ویب ڈیسک) کراچی میں شہری تھانوں کے باہر بھی محفوظ نہیں رہے، شارع فیصل تھانے آنے والا شہری شارٹ ٹرم کڈنیپنگ کا شکار ہوگیا۔

روزنامہ "جنگ "کے مطابق  2ملزمان اسلحے کے زور پر شہری کو اغواء کرکے باآسانی اپنے ساتھ لے گئے اور پھر گاڑی اور نقدی لے کر اسے سپر ہائی وے پر اتار کر فرار ہوگئے۔شارع فیصل تھانے کے گیٹ سے 2 ملزمان اسلحہ کے زور پر شہری محمد علی کو اس کی گاڑی سمیت اغوا ءکرکے ساتھ لے گئے، محمد علی اپنے دوست کے حادثے کے سلسلے میں تھا نے سے باہر آیا تھا۔  پولیس حکام کا کہنا ہے کہ واقعے کا مقدمہ شارع فیصل تھانے میں درج کرلیا گیا، مقدمے میں شارٹ ٹرم کڈنیپنگ اور اغوا ءکی دفعات شامل کی گئی ہیں۔

ایف آئی آر کے مطابق ملزمان شہری محمد علی کو شارع فیصل سے اغواء کرکے فیڈرل بی ایریا بلاک 10 لے کر گئے، جہاں ملزمان نے شہری کے اے ٹی ایم کارڈ سے 1 لاکھ 80 ہزار روپے بھی نکلوائے۔فیڈرل بی ایریا سے رقم نکلوانے کے بعد ملزمان نے سپر ہائی وے ٹول پلازہ کے قریب شہری کو گاڑی سے اتارا اور فرار ہوگئے، ملزمان 3 گھنٹے سے زائد شہری کو اسلحہ کے زور پر شہر بھر میں گھماتے رہے۔