نواز شریف، آصف زرداری کا ایجنڈا ذاتی ،ہمارا پاکستان کا ہے،سراج الحق

لاہور (ڈیلی پاکستان آن لائن) امیر جماعت اسلامی سراج الحق کا کہنا ہے کہ نواز شریف، آصف زرداری کا ایجنڈا ذاتی ہے ہمارا ایجنڈا پاکستان کا ہے۔خواہش تھی پیپلز پارٹی، مسلم لیگ ن کے رہنما اس جلسے میں شریک ہوتے لیکن افسوس ان میں کوئی ایک صوبہ فتح کرنے نکلا ہے تو کوئی دوسرا صوبہ۔

لاہور میں غزہ مارچ کے شرکاء سے خطاب میں ان کا کہنا تھا کہ لوگ پوچھتے ہیں ان جلسوں سے کیا بنے گا؟ آج کا مجمع دشمن کو پیغام دے رہا ہے فلسطینی اکیلے نہیں، لاہور نےثابت کر دیا کہ یہ لاکھوں لوگ فلسطینی بھائیوں کے ساتھ ہیں، غزہ کے لوگوں کو بچانے کیلئے عملی اقدامات کی ضرورت ہے۔ہمارا یقین تھا او آئی سی غزہ کے معاملے پر کوئی عملی لائحہ عمل دے گا، افسوس او آئی سی نے صرف بےاثر قرارداد منظور کی، قراردادیں اس وقت تک بےکار ہیں جب تک امت جہاد کا راستہ اختیار نہیں کرتی۔

امیر جماعت اسلامی نے کہا کہ اسرائیل کو سامراجی قوتوں نے مل کر بنایا، فلسطینی پتھروں اور غلیلوں سے اسرائیلی بارود کا مقابلہ کر رہے ہیں، دنیا بھر کے مہذب معاشرے اسرائیلی جارحیت کی مذمت کر رہے ہیں۔بھارت کو خطرہ ہے غزہ کے فلسطینی کامیاب ہوگئے تو کشمیر کی آزادی ہوگی۔