قائداعظم کرکٹ ٹرافی کا ساتواں مرحلہ آج سے شروع ہوگا
لاہور(سپورٹس رپورٹر)پاکستان کرکٹ بورڈ کے زیراہتمام جاری قائداعظم فرسٹ کلاس کرکٹ ٹرافی کا ساتواں مرحلہ (آج) جمعہ سے شروع ہوگا۔ تفصیلات کے مطابق گروپ اے میں قدافی سٹیڈیم لاہور میں لاہور وائٹس کا مقابلہ اسلام آباد سے ہوگا۔ ایبٹ آباد سٹیڈیم میں فاٹا اور پشاور کی ٹیموں کے درمیان میچ کھیلا جائے گا۔ اقبال سٹیڈیم فیصل آباد میں نیشنل بینک آف پاکستان اور حبیب بینک کی ٹیمیں مدمقابل ہوں گی۔ کے آر ایل سٹیڈیم راولپنڈی میں سوئی نادرن گیس پائپ لائنز اور کے آر ایل کی ٹیمیں آمنے سامنے ہوں گی۔ گروپ بی میں ایل سی سی اے گراؤنڈ لاہور میں کراچی وائٹس اور لاہور بلیو کی ٹیموں کے درمیان میچ ہوگا۔ پنڈی سٹیڈیم میں راولپنڈی اور ملتان کی ٹیموں کا ٹکراؤ ہوگا۔ مرغزار گراؤنڈ اسلام آباد میں پی ٹی وی اور پاکستان واپڈا کی ٹیمیں آمنے سامنے ہونگی جبکہ ڈائمنڈ گراؤنڈ اسلام آباد میں زرعی ترقیاتی بینک اور سوئی سدرن گیس کمپنی کی ٹیمیں آپس میں ٹکرائیں گی۔ قائد اعظم کرکٹ ٹرافی پاکستان کرکٹ بورڈ کے ترجمان شکیل خان نے بتایا کہ ٹورنامنٹ میں ملک بھر سے 16 ٹیمیں حصہ لے رہی ہیں جن کو دو گروپوں میں تقسیم کیا گیا ہے۔ گروپ اے میں لاہور وائٹس، سوئی نادرن گیس پائپ لائینز، پشاور، کہوٹہ ریسرچ لیبارٹریز (کے آر ایل)، اسلام آباد، حبیب بینک، فاٹا اور نیشنل بینک آف پاکستان جبکہ گروپ بی میں کراچی وائٹس، پاکستان واپڈا، راولپنڈی، سوئی سدرن گیس پائپ لائنز، ملتان، پی ٹی وی، لاہور بلیو اور زرعی ترقیاتی بینک کی ٹیمیں شامل ہیں۔
