”میں اپنی کامیابی اس کے نام کرتا ہوں‘ ‘ محمد عباس ایک مرتبہ پھر چھا گئے

ابوظہبی (ڈیلی پاکستان آن لائن) آسٹریلیا کیخلاف ٹیسٹ سیریز میں تباہ کن کارکردگی دکھانے والے باﺅلر محمد عباس نے اپنی کامیابی بیٹی کے نام کر دی ہے۔
محمد عباس نے ابو ظہبی ٹیسٹ میں شاندار باﺅلنگ کا مظاہرہ کرتے ہوئے 10 وکٹیں اپنے نام کیں جس پر انہیں مین آف دی میچ اور سیریز قرار دیا گیا۔ اس موقع پر محمد عباس نے کہا کہ اس کامیابی پر اللہ تعالیٰ کا شکر ادا کرتا ہوں، یہ دن بہت خوشی کے ہیں۔ انہوں نے کہا کہ کل بیٹی کی سالگرہ تھی اور اپنی ہی کامیابی بیٹی کے نام کرتا ہوں۔
محمد عباس نے کہا کہ وکٹ کسی بھی طرح کی ہو، میرا کام لائن میں باﺅلنگ کرنا ہے، کوچ اظہر محمود سے میٹنگ ہوئی اور مخالف ٹیم کے پوائنٹس دیکھے، اسی پر باﺅلنگ کی کوشش کی اور کامیابی ملی۔
انہوں نے کہا یہ کامیابی میرے لئے بہت بڑی عزت کی بات ہے، ٹیسٹ کا پہلا تجربہ ہے، کوشش تھی کہ یہ کام انگلینڈ میں کروں مگر نہیں کرسکا لیکن جلد سے جلد کرنے کی کوشش کی۔میڈیم پیسر کا کہنا تھاکہ محنت کر رہا ہوں جب بھی ون ڈے میں ٹیم کو ضرورت ہوئی اور مینجمنٹ نے بلایا تو حاضر ہوں گا۔