فلسطین میں ادویات ختم، گردوں کے 400 مریضوں کی زندگی خطرے سے دوچار 

غزہ (یواین پی)فلسطین کے علاقے غزہ کی پٹی میں گردوں کے 400 مریضوں کی زندگیاں خطرے سے دوچار ہوچکی ہیں۔ مقامی حکام کا کہنا ہے کہ گردوں کے مریضوں کی ضروری ادویات ختم ہیں اور سیکڑوں مریضوں کی زندگی داؤ پر لگی ہوئی ہے۔
غزہ وزارت صحت کے ترجمان اشرف القدرہ نے بتایا کہ غزہ کے ہسپتالوں میں ایسے 400 مریض ہیں جن کے گردوں کی پیوند کاری کی گئی ہے۔ اگر ان کے علاج کے لیے درکار ادویات نہیں ملتیں تو ایسے تمام مریض ڈائیلائسز پر منتقل ہوسکتے ہیں۔ادھر غزہ میں الشفا میڈیکل کمپلیکس کے مصنوعی گردوں کے شعبے کے انچارج عبداللہ نے بتایا کہ ہسپتال میں گردوں کے مریضوں کی ادویہ ختم ہوچکی ہیں۔ انہوں نے کہا کہ گردوں کی پیوند کاری کے عمل سے گزرنے والے مریضوں کو Mycophenolate اور Valganciclovir نامی دوائی کی فوری ضرورت ہے، مگر ہسپتال میں ان دونوں ناگزیر ادویات کا سٹاک ختم ہوچکا ہے۔واضح رہے کہ غزہ کی پٹی پر اسرائیل اور فلسطینی اتھارٹی نے دوہری پابندیاں عائد کررکھی ہیں جس کے نتیجے میں علاقے میں صحت کا بدترین بحران جاری ہے۔