مودی سرکار کو پوری دنیا میں ذلت و رسوائی کے سوا کچھ نہیں ملے گا‘ دوست محمد مزاری

راجن پور‘مٹھن کوٹ( نمائندہ خصوصی، نامہ نگار)قائمقام سپیکر پنجاب اسمبلی سردار میردوست محمد خان مزاری نے صحافیوں سے گفتگو کرتے ہوئے کہا ہے کہ مسئلہ کشمیر پر حکومتِ پاکستان کے مطالبہ پر اقوامِ متحدہ کی سلامتی کونسل کا اجلاس کرنا اور اس اجلاس میں پاکستان کے موقف کی حمایت کرنا، کہ مسئلہ کشمیر کو اقوامِ متحدہ کی قراردادوں کے عین مطابق حل ہونا چاہیے، یہ پاکستان کی سفارتی سطح پر بہت بڑی کامیابی ہے۔ یہ پاکستان(بقیہ نمبر42صفحہ12پر)

 تحریکِ انصاف کی حکومت کی کامیاب خارجہ پالیسی کا نتیجہ ہے کہ سفارتی سطح پر بھارت کو کشمیر کے معاملہ پر شکست ہوئی ہے اور 15اگست کو پوری دنیا نے بھارت کے یومِ آزادی کو یوم سیاہ کے طور پر منا کر نہتے کشمیری مسلمانوں کے ساتھ اظہارِ یکجہتی کیا ہے۔انہوں نے کہا کہ پاکستان تحریکِ انصاف کی حکومت داخلہ اور خارجہ دونوں سطح پر کامیابی سے پاکستان کے مفادات کا تحفظ کر رہی ہے اور آج پاکستان نے اپنی بہترین حکمتِ عملی کے ذریعے پوری دنیا میں مظلوم کشمیریوں کے لیے ہمدردیاں پیدا کر دی ہیں۔قائمقام سپیکر نے مزید کہا کہ آج بھارت کو اقوامِ عالم میں سفارتی سطح پر تو شکست ہو چکی ہے لیکن اگر بھارت نے کوئی جارحانہ رویہ اپناتے ہوئے ہم پر جنگ مسلط کرنے کی کوشش کی تو پوری پاکستانی قوم اپنی بہادر افواج کے ساتھ شانہ بشانہ کھڑے ہو کر بھارت کی اینٹ سے اینٹ بجا دیں گے اور مودی سرکار کو پوری عالمی دنیا میں ذلت و رسوائی کے سوا کچھ نہیں ملے گا۔آخر میں انہوں نے کہا کہ کشمیر نہ کبھی بھارت کا حصہ تھا، نہ ہے اور نہ ہی بھارت کا حصہ بننے دیں گے۔پاکستان تحریکِ انصاف کا منشور اور ہر پاکستانی فرد کی صرف ایک ہی آواز ہے کہ کشمیر بنے گا پاکستان اس موقع پر سردار اطہر علی خان مزاری ایڈووکیٹ، شمشاداحمد خان کورائی، سید آصف حسین بخاری ایڈووکیٹ، ملک بابر خان اور دیگر بھی موجود تھے۔
دوست مزاری