کراچی کے ہسپتالوں میں پلاسٹک بیگز کے استعمال پر پابندی عائد
کراچی (آئی این پی) ڈی جی ہیلتھ نے تمام سرکاری ہسپتالوں کے ایم ایس کومراسلہ جاری کرتے ہوئے کہا ہے کہ ہسپتالوں میں پلاسٹک کی تھیلیوں کااستعمال نہ کیاجائے۔تفصیلات کے مطابق کراچی کے ہسپتالوں میں پلاسٹک بیگ کے استعمال پر پابندی عائد کردی گئی، پابندی وزیر اعلی سندھ کے احکامات پرلگائی گئی، جناح ہسپتال کی انتظامیہ نے آفس آرڈر جاری کر دیا ہے۔دوسری جانب پلاسٹک کی تھیلیوں کیخلاف مہم سے متعلق ڈی جی ہیلتھ نے تمام سرکاری ہسپتالوں کے ایم ایس کومراسلہ جاری کردیا ہے، جس میں ڈاکٹرمسعودسولنگی نے کہا ہے کہ ہسپتالوں میں پلاسٹک کی تھیلیوں کااستعمال نہ کیاجائے، متبادل کے طور پر کاغذ یا کپڑے کے تھیلے استعمال کیے جائیں۔ڈی جی ہیلتھ کا مزید کہنا تھا کہ وزیراعلی سندھ کی ہدایات پرسختی سے عمل کیاجائیگا۔محکمہ ماحولیات سندھ نے پلاسٹک تھیلیوں کی پابندی پر عملدرآمد کرانے کا اعلان کردیا تھا، جس کے مطابق پابندی کا اطلاق رواں سال یکم اکتوبر سے ہوگا۔پیپلزپارٹی رہنما مرتضی وہاب نے پلاسٹک تھیلیوں کے کارخانوں، دکانداروں سے تعاون کی اپیل کرتے ہوئے کہا تھا کہ بہتر مستقبل کے لیے سندھ حکومت کا ساتھ دیں، پلاسٹک تھیلیوں کا استعمال ممنوع ہے اس پر عملدرآمد کرانا چاہتے ہیں، کراچی کے 50 فیصد برساتی نالے پلاسٹک کی تھیلیوں کی وجہ سے چوک ہیں۔واضح رہے کہ وفاقی حکومت کی جانب سے 14 اگست کے بعد اسلام آباد میں پلاسٹک بیگز پر پابندی ہے، پلاسٹک بیگز استعمال کرنے والوں پر بھاری جرمانہ عائد کیا جائے گا۔
پلاسٹک بیگز/ پابندی
