سلامتی کونسل کا کشمیر پر اجلاس کامیابی ضرور،معاملہ آگے بڑھانا اصل چیلنج،ملیحہ لودھی

اسلام آباد(ا ین این آئی) اقوام متحدہ میں پاکستان کی مستقل مندوب ملیحہ لودھی نے کہا ہے بھارت نے مقبوضہ کشمیر کو جیل میں تبدیل کر رکھا ہے لیکن عالمی سطح پر کشمیریوں کیلئے ماحول سازگار ہوگیا ہے۔گزشتہ روزایک انٹرویو ملیحہ لودھی کا مزید کہنا تھا مسئلہ کشمیر کے حوالے سے عالمی ماحول میں تبدیلی کی وجہ سے مغرب میں رائے عامہ بھی بدل رہی ہے، بھارت کی تمام تر کوششوں کے باوجود سلامتی کونسل کے پندرہ ممبران نے اجلاس پر اتفاق کیا، پاکستان کیلئے اب چیلنج یہ ہے کہ اس معاملے کو آگے بڑھانا ہے۔ اجلاس میں جو بریفنگ دی گئی اس میں کھل کر بتایا گیا بھارت کیا کر رہا ہے اور اس کے نتیجے میں کیا ہوسکتا ہے۔ چین، روس، برطانیہ اور امریکہ بھی چاہتے ہیں مسئلہ کشمیر کا کوئی حل نکلے،مقبوضہ کشمیر کی صورتحال سے بھارت بوکھلا گیا ہے کیونکہ کشمیر کے عوام وادی سے بھارت کا مکمل انخلاء چاہتے ہیں، ملیحہ لودھی کا مزید کہنا تھا سلامتی کونسل کا اجلاس اس بات کا ثبوت ہے یہ بھارت کا اندرونی معاملہ نہیں، بھارت نے اپنے لیے مشکل صورتحال پیدا کرلی ہے جس سے وہ خوفزدہ بھی ہے،ملیحہ لودھی نے کہا وزیر اعظم عمران خان، وزیرخارجہ اس حوالے سے مسلسل مشاورت کر رہے ہیں کہ اس معاملے پر اب مزید کیا کرنا ہے، پاکستان مسئلہ کشمیر کا پرامن حل چاہتا ہے اس کیلئے کبھی مذاکرات سے انکار نہیں کیا لیکن بھارت نے یہ راستہ بند کررکھا ہے۔ جب بات دو طرفہ مذاکرات سے نہیں بنی تو ہم نے معاملے کو عالمی سطح پر اٹھانے کی کوشش کی جس کے دوران امریکہ اور روس کی جانب سے ثالثی کی پیشکشیں سامنے آئی ہیں۔
ملیحہ لودھی