چیئرمین سینیٹ 25اگست کو4روزہ سرکاری دورے پریو اے ای جائینگے 

اسلام آباد(آن لائن)چیئرمین سینیٹ محمد صادق سنجرانی 25 سے 28 اگست کو پارلیمانی وفد کے ہمراہ متحدہ عرب امارات کا سرکاری دورہ کریں گے۔ چیئرمین سینٹ کو دورے کی دعوت متحدہ عرب امارات کی حکومت نے دی ہے، دورے کے دوران چیئرمین سینٹ اور پارلیما نی وفد متحدہ عرب امارات کی اعلیٰ سیاسی قیادت اور حکومتی سربراہان سے ملاقاتیں کریں گے، دورے کا مقصد دونوں برادر اسلامی ملکوں کے درمیان سیاسی، سماجی اور اقتصادی تعلقات کے فروغ کیلئے پارلیمانی روابط کو مزید مستحکم بنانے کیساتھ کشمیر میں بھارتی مظالم و جارحیت کے نتیجے میں علاقائی امن کو درپیش خطرات سے متحدہ عرب امارات کی قیادت کو آگاہ اورقیام امن میں پاکستان کی کوششوں کو اْجاگر کرنا ہے۔ اس سلسلے میں گفتگو کرے ہوئے چیئرمین سینٹ صادق سنجرانی کا کہنا ہے پاکستان اور متحدہ عرب امارات خطے اورمسلم ا مہ کے اہم ممالک ہیں،دونوں ملکوں کو مسئلہ کشمیر کے حل اور علاقائی امن کیلئے مشترکہ کوششیں کرنی چاہئیں، دونوں ممالک کے مابین معاشی تعاون کے فروغ کی بے پناہ استعداد موجود ہے۔ دونوں ممالک خطے کی ترقی و خوشحالی کیلئے مشترکہ ایجنڈے پر عمل پیرا ہو کر مزید بہتری لا سکتے ہیں، دونوں ممالک کے مابین تاریخی و ثقافتی قدریں بھی مشترک ہیں، پاکستانیوں کی بہت بڑی تعداد متحدہ عرب امارات کی ترقی و خوشحالی میں اپنا کردار ادا کر رہی ہے۔ متحدہ عرب امارات کو پاکستان میں امن و امان کی بہتر صورتحال سے فائدہ اٹھا کر سرمایہ کاری کو فروغ دینا چاہیے۔ گو ا در خطے کی ترقی اور سرمایہ کاری کا بہترین مرکز بن چکا ہے اس کی افادیت سے متحدہ عرب امارات اور دیگر علاقائی ممالک کو بھر پور فائدہ اٹھانا چاہئے۔ ملاقاتوں کے دوران دونوں ممالک کے درمیان دو طرفہ تجارت کے فروغ کیلئے قیادت کے مابین باہمی رابطوں اور پارلیمانی وفود کے تبادلوں میں اضافے پر زور دیا جائے گا۔
چیئرمین سینیٹ