بد عنوا ن عناصر کے بلا امتیاز احتساب کیلئے تمام وسائل بروئے کا لا رہے ہیں: چیئر مین نیب 

اسلام آباد(سٹاف رپورٹر) قومی احتساب بیورو (نیب) کے چیئرمین جسٹس جاوید اقبال نے کہا ہے کہ نیب ملک سے ہر قسم کی بدعنوانی کے خاتمہ کیلئے پرعزم ہے۔ نیب احتساب سب کی پالیسی پر عمل کرتے ہوئے بدعنوان عناصر کے بلا امتیاز احتساب کیلئے تمام وسائل بروئے کار لا رہا ہے۔ نیب نے آگاہی تدارک اور انفورسمنٹ پر مشتمل سہ جہتی پالیسی اختیار کی ہے جس کے مثبت نتائج سامنے آئے ہیں۔ ان خیالات کا اظہار انہوں نے اپنے ایک بیان میں کیا۔ انہوں نے کہا کہ جعلی مالی کمپنیاں،منی لانڈرنگ، بینک فراڈ، بینک نادہندگی، اختیارات سے تجاوز اور سرکاری ملازمین کی جانب سے سرکاری فنڈز میں خورد برد کے مقدمات کو ترجیحی بنیادوں پر نمٹانا نیب کی اولین ترجیحات ہیں۔ انہوں نے کہا کہ پلڈاٹ، مشال پاکستان، ٹرانسپرینسی انٹرنیشنل اور عالمی اقتصادی فورم جیسے معتبر قومی اور عالمی اداروں نے بدعنوانی کے خاتمہ کیلئے نیب کی کوششوں کی تعریف کی ہے۔ اسی طرح گیلانی اینڈ گیلپ سروے میں 59 فیصد لوگوں نے نیب پر اعتماد کا اظہار کیا ہے۔ انہوں نے کہا کہ نیب نے مقدمات کو تیزی سے نمٹانے کے لئے 10 ماہ کا عرصہ مقرر کیا ہے جس میں شکایت کی جانچ پڑتال کیلئے دو ماہ، انکوائری کیلئے چار ماہ اور انوسٹی گیشن کے لئے چار ماہ مقرر ہیں۔ چیئرمین نیب نے تمام ڈائریکٹر جنرلز کو ہدایت کی ہے کہ تمام شکایات، انکوائریاں اور انوسٹی گیشنز قانون کے مطابق مقررہ عرصہ کے دوران نمٹائی جائیں تاہم اگر مقررہ وقت میں توسیع کی ضرورت ہو تو مجاز حکام سے منظوری حاصل کی جائے۔
چیئرمین نیب