آڈیو لیکس کیس:اسلام آباد ہائیکورٹ کے فیصلےکے خلاف اپیل کا حکمنامہ جاری

اسلام آباد (ڈیلی پاکستان آن لائن) سپریم کورٹ نے آڈیو لیکس کیس میں اسلام آباد ہائیکورٹ کے 19 اگست کے فیصلے کے خلاف وفاقی حکومت کی اپیل کی سماعت کا تحریری حکمنامہ جاری کردیا۔
جسٹس امین الدین خان اور جسٹس نعیم اختر افغان پر مشتمل دو رکنی بینچ کا تحریری حکمنامہ 5 صفحات پر مشتمل ہے،جس میں کہا گیا کہ 19 مئی 2023 کو وفاقی حکومت نے انکوائری کمیشن قائم کیا،جسٹس قاضی فائز عیسیٰ کی سربراہی میں انکوائری کمیشن تشکیل دیا گیا، جسٹس نعیم اختر افغان اور جسٹس عامر فاروق بھی تین رکنی کمیشن کا حصہ تھے، سپریم کورٹ نے انکوائری کمیشن کو کام سے روکا جسکے بعد آج تک دوبارہ اجلاس نہ ہوسکا، وفاقی حکومت نے اپنی اپیل میں مؤقف اختیار کیا کہ ہائیکورٹ نے ازخود نوٹس کے دائرہ اختیار کو استعمال کیا، بشریٰ بی بی نے ہائی کورٹ میں دائر کی گئی رٹ میں کہا کہ آڈیو من گھڑت ہے، ہائی کورٹ اس بات کی پابند تھی کہ پہلے ان الزامات کا جائزہ لیتی، تاحکم ثانی اسلام آباد ہائیکورٹ کو کارروائی سے روکتے ہیں۔
حکمنامے میں مزید کہا گیا کہ فریقین کو نوٹسز جاری کیے گئے ہیں ، فریقین چاہیں تو اضافی دستاویزات جمع کراسکتے ہیں۔