اپوزیشن نے آرمی چیف سے حکومت گرانے کا کوئی مطالبہ نہیں کیا:احسن اقبال

 لاہور (جنرل رپورٹر) ن لیگ کے سینئر رہنما احسن اقبال نے کہا ہے کہ ادارے پی ڈی ایم نہیں حکومت کی کارکردگی سے پریشان ہیں، اپوزیشن نے آرمی چیف سے حکومت گرانے کا کوئی مطالبہ نہیں کیا، عوام کی طاقت سے سلیکٹڈ حکومت کوگھربھیجیں گے۔لاہور میں میڈیا سے گفتگو کرتے ہوئے احسن اقبال نے کہا کہ ہمارا لانگ مارچ ملک بچانے کیلئے ہوگا، یکم فروری کوپی ڈی ایم لیڈرشپ حتمی لانگ مارچ کا اعلان کریگی، پی ڈی ایم کی تمام جماعتیں مٹھی کی طرح متحد ہیں۔ سیاست دانوں نے ہمیشہ پاکستان کومضبوط کیا، مارشل لا ادوارمیں پاکستان کونقصان ہوا، ہرجمہوری حکومت نے پاکستان کومضبوط کیا، تاریخ سے سبق سیکھنا چاہیے۔ ہرکسی کوخوداحتسابی کرنی چاہیے۔ اب وقت آگیا ہے کہ اسٹیبلشمنٹ اور دیگر کو اپنے ماضی سے سبق سیکھنا چاہیے، سیاست میں اسٹیبلشمنٹ کے مداخلت کے سارے دروازے بند ہونے چاہئیں، سیاست دان تو سیکھ چکے، اب اسٹیبلشمنٹ کوسیکھنا چاہیے۔ اس حکومت نے چند ماہ کے بعد رخصت ہوجانا ہے، اینٹی کرپشن، ایف آئی اے، پولیس کو مہمان حکومت کی خاطراپنی ملازمتوں کودغدارنہیں کرنا چاہیے، شہبازشریف، حمزہ شہبازکوانتقام کی بنیاد پرگرفتارکیا ہوا ہے۔انہوں نے کہاکہ پی ڈی ایم تحریک عوام کی تحریک بن چکی ہے۔ پی ڈی ایم کااعلان لاہور،قرارداد پاکستان کے بعد اہم ترین قرارداد ہے، تمام جماعتوں نے ملکرچلنے کا وعدہ کیا ہے۔ اپوزیشن اقتدارنہیں عوام کوبچانے کی جنگ لڑرہے ہیں۔ مہنگائی بڑھ گئی، حکومت سرکاری ملازمین کی تنخواہوں میں 20فیصد اضافہ کرکے ریلیف دے۔آٹا،چینی بحران میں 400ارب کا نقصان کیا گیا، بی آرٹی منصوبے پرنیب، ایف آئی اے کدھرہے؟ سپریم کورٹ نے کہا نیب ون سائیڈ احتساب کررہا ہے۔ آج پاکستان کی کوئی ایئرلائن یورپ نہیں جاسکتی، وزیر کے غیرذمہ داربیان نے ایوی ایشن انڈسٹری کا بیڑہ غرق کردیا۔وزیراعظم عمران خان نے دوسالوں میں دفاعی بجٹ میں اضافہ نہیں کیا، اداروں میں بے چینی کی وجہ آپ کی بدنامی ان کے حصے میں کیوں آرہی ہے۔ سعودی عرب،یواے ای پاکستان سے ناراض کیوں ہوئے۔اس حکومت نے ملک کا ستیاناس کردیا ہے، عمران نیازی ایل بی ڈبلیواورکیچ آؤٹ بھی ہوچکے ہیں، یہ اب ضدی بچے کی طرح بیٹھے ہیں، ان کونکالنے کے لیے لانگ مارچ کریں گے۔
احسن اقبال