کورونا ویکسین سے انسان کے مگر مچھ بننے خواتین کی داڑھی نکلنے کا خدشہ،برازیلی صدر

برازیلیا(مانیٹرنگ ڈیسک) برازیل کے صدر جیئر بولسونارو کا کہنا ہے کورونا ویکسین لگانے سے انسان مگر مچھ بن سکتا ہے یا خواتین کی داڑھی نکل سکتی ہے۔تفصیلات کے مطابق گذشتہ ایک ہفتے سے برازیل میں فائزر اور بائیون ٹیک کی بنائی گئی ویکسین کی آزمائش جاری ہے اور برازیلی صدر اسے ملک بھر میں مفت فراہم کرنے کا بھی اعلان کرچکے ہیں تاہم اب ان کی جانب سے متضاد بیان ایسے وقت سامنے آیا ہے جب وہ ملک بھر میں کورونا ویکسینیشن مہم کا افتتاح کررہے تھے۔جولائی میں کورونا کا شکار ہونیوالے جیئر بولسوناروکا کہنا تھاوہ خود کورونا کی ویکسین نہیں لگوائیں گے۔ انہوں نے دعویٰ کیا کہ فائزر کے معاہدے میں یہ بات واضح ہے کہ وہ اس کے ضمنی اثرات(سائیڈ ایفکیٹس) کے ذمہ دار نہیں ہوں گے۔جیئر بولسونارو کے مطابق دواساز ادارے کا کہنا ہے اگر ویکسین لگنے کے بعد آپ مگرمچھ بن گئے تو یہ آپ کا مسئلہ ہے، اگر آپ سپر ہیومن بن جائیں یا کسی خاتون کی داڑھی نکل آئے یا کسی شخص کی آواز بدل جائے تو یہ ہمارا قصور نہیں ہوگا۔ان کا کہنا تھا یہ ویکسین سب کیلئے مفت ہے لیکن اسے لگوانے کیلئے کسی کو مجبور نہیں کیا جائے گا۔واضح رہے برازیل میں کورونا سے متاثرہ افراد کی تعداد 71 لاکھ سے زائد ہوچکی ہے اور اب تک تقریباً ایک لاکھ 85 ہزار افراد کورونا وائرس سے ہلاک ہوچکے ہیں جبکہ برازیلی صدر نے کورونا کے آغا ز میں اسے معمولی فلو قرار دیا تھا اور جب بڑی تعداد میں شہری کورونا کا شکار ہونے لگے تو حکومت کی جانب سے مریضوں کی اصل تعداد سے آگاہ کرنے کا سلسلہ بھی روک دیا گیا جس پر ان کی حکومت کو شدید تنقید کا سامنا کرنا پڑا تھا۔
برازیلی صدر