کورونا کی نئی قسم دریافت ہونے کے بعد یورپی ممالک نے برطانیہ کے ساتھ سفری تعلق ختم کردئیے
لندن(مجتبیٰ علی شاہ )برطانیہ میں کورونا وائرس کی نئی خطرناک قسم دریافت ہونے کے بعد یورپی یونین میں شامل تمام ممالک نے برطانیہ آنے اور جانے پرمکمل پابندی عائد کردی ہے۔
یورپ کے بیشتر ممالک جن میں اٹلی ،بیلجیئم اور نیدر لینڈ شامل ہیں نے کورونا وائرس کی نئی قسم کے پھیلاؤ کو روکنے کے لئے برطانیہ سے آنے اور جانے کے لئے سفری پابندیاں عائد کر دی ہیں جبکہ مزید سخت اقدامات پر بھی غور کیا جا رہا ہے ۔دوسری طرف بیلجیئم نے برطانیہ کے ساتھ اپنی سرحد بند کردی ہے جب کہ نیدر لینڈ بھی برطانیہ سے سفری پابندی عائد کرچکا ہے۔نیدر لینڈ اور بیلجیئم دونوں نے پروازیں معطل کردی ہیں اور ساتھ ہی ساتھ بیلجیئم جانے والی ٹرینوں پر بھی پابندی عائد کردی گئی ہے۔
اٹلی کےوزیرخارجہ نےاپنی حکومت کی طرف سے برطانیہ کے لئے پروازوں پر پابندی عائد کرنےکااشارہ دیا ہے جبکہ اسی طرح کے احکامات اور کارروائی کی منصوبہ بندی کرنے والے دوسرے ممالک میں فرانس اور جرمنی بھی شامل ہیں۔ فرانس کے نشریاتی ادارے بی ایف ایم نے بتایا ہے کہ فرانس نے برطانیہ کے ساتھ سفری پابندیاں عائد کرنے پرغور و خوض کرنا شروع کردیا ہے۔کورونا کی یہ نئی شکل لندن اور جنوب مشرقی انگلینڈ میں تیزی سے پھیل گئی ہےاور اسکے پھیلاؤ کو روکنے کے لیے برطانوی حکومت کی جانب سے سخت اقدامات کیے جارہے ہیں ۔دوسری طرف سائنسدانوں نے خبردار کیا ہے کہ کورونا کی نئی قسم ایک دوسرے سے منتقل ہونے میں 70 گنا زیادہ تیز ثابت ہو رہی ہے جبکہ برطانوی وزیراعظم بورس جانسن نے اسی حوالے سے کہا ہے کہ حکومت کو اس سلسلے میں فوری اقدامات کرنا ہوں گے۔
