شوکت ترین 87 ووٹ لے کر سینیٹر منتخب ہو گئے
پشاور ( ڈیلی پاکستان آن لائن ) خیبرپختونخوا سے سینیٹ کی خالی نشست پر پاکستان تحریک انصاف کے امیدوار شوکت ترین سینیٹر منتخب ہو گئے ، شوکت ترین نے 87 ووٹ حاصل کئے ۔
خیبر پختونخوا میں سینیٹ کی سیٹ پاکستان تحریک انصاف کے سینیٹر ایوب آفریدی کے مستعفی ہونے کے باعث خالی ہوئی تھی جس پر آج پولنگ ہوئی ، 145 کے ایوان میں سے سینیٹر کیلئے 73 ووٹ درکار تھے ، شوکت ترین نے 87 ووٹ حاصل کئے ۔عوامی نیشنل پارٹی کے شوکت امیر زادہ ، پاکستان پیپلزپارٹی کے محمد سعید اور جے یو آئی ف کے ظاہر شاہ بھی سینیٹر کے امیدوار تھے ۔
145 ارکان پر مشتمل صوبائی اسمبلی میں پاکستان تحریک انصاف کے 94 ارکان تھے ، صوبائی اسمبلی میں دوسری بڑی جماعت جے یو آئی ف ہے جس کے ارکان کی تعداد 15 ، اے این پی کی 12 ، مسلم لیگ ن کی 7، پاکستان پیپلزپارٹی کی 5 اور بلوچستان عوامی پارٹی کی چار ہے ۔
خیبرپختونخوا کی اسمبلی میں جماعت اسلامی کے تین اور مسلم لیگ ق کا ایک امیدوار ہے جبکہ چار ارکان آزاد ہیں ۔
