سینیٹ انتخابات، الیکشن کمیشن کازیر حراست ارکان اسمبلی کی شرکت یقینی بنانے کا حکم

  اسلام آباد(سٹاف رپورٹر)الیکشن کمیشن آف پاکستان (ای سی پی) نے قومی اسمبلی میں قائد حزب اختلاف اور پاکستان مسلم لیگ(ن)کے صدر شہباز شریف اور دیگر اپوزیشن رہنماؤں کو سینیٹ انتخابات کے لیے پولنگ اسٹیشن میں حاضری یقینی بنانے کا حکم دے دیا۔جمعہ کوالیکشن کمیشن سے جاری حکم نامے میں کہا گیا ہے کہ سینیٹ الیکشن کے لیے تمام گرفتار اراکین قومی اور صوبائی اسمبلی کے پروڈکشن آرڈر جاری کر دیے جائیں۔اپوزیشن اراکین کے پروڈکشن آرڈر کے حوالے سے قومی احتساب بیورو (نیب)کے چیئرمین، پنجاب اور سندھ حکومت کے چیف سیکرٹریز کو ہدایات جاری کردی گئی ہیں۔الیکشن کمیشن نے کہا کہ 3 مارچ کو سینیٹ انتخابات میں ووٹنگ کے لیے گرفتار اراکین اسمبلی کی پولنگ اسٹیشن میں حاضری یقینی بنائی جائے۔حکم نامے میں کہا گیا ہے کہ قومی اسمبلی میں قائد حزب اختلاف شہباز شریف، خورشید شاہ، علی وزیر، خواجہ آصف اورپنجاب اسمبلی کے قائد حزب اختلاف حمزہ شہباز کے پروڈکشن آرڈر جاری کر دیے جائیں۔الیکشن کمیشن نے کہا کہ انتخابات کے انتظامات کرنا اور شفاف، غیر جانب دار، قانون کے مطابق کروانے اور کرپشن سے پاک کرنے کی ذمہ داری الیکشن کمیشن ہے۔حکم نامے کے مطابق آئین کے آرٹیکل 220 اور الیکشن ایکٹ 2017 کی دفعہ 5 کے تحت چیف الیکشن کمشنر اور الیکشن کمیشن کو اپنے فرائض کی انجام دہی میں معاونت کرنا وفاق اور صوبوں کے تمام انتظامی حکام کا فرض ہے۔
 سینیٹ انتخابات