کلبھوشن حاضر سروس، بھارتی مداخلت کا پاکستانی موقف درست ہے: جاپانی جریدہ
ٹوکیو (آئی این پی)جاپانی جریدے” دی ڈپلومیٹ “نے کلبھوشن یادیو بھارت کو حاضر سروس فوجی جاسوس اور دہشتگرد قرار دے دیا۔ میڈیا رپورٹ میں” را “کے حاضر سروس اور ریٹائرڈ افسران اس بات کا اعتراف بھی کرچکے ہیں۔ دی ڈپلومیٹ کے مطابق بلوچستان اور افغانستان میں بھارتی مداخلت پر پاکستان کے اعتراضات درست ہیں۔جاپانی جریدے دی ڈپلومیٹ کے مطابق بھارتی بحریہ کے افسر کلبھوشن یادیو کو 2016ء میں پاکستانی سکیورٹی فورسز نے بلوچستان سے گرفتارکیا تھا۔ تاحال بھارت اس سے انکارکرتارہاہے کہ ریٹائرمنٹ کے بعد کلبھوشن کا ریاست سے کوئی تعلق ہے۔
جاپانی جریدہ لکھتا ہے کہ بھارت افغانستان اور بلوچستان میں مسلسل مداخلت کررہاہے۔ کلبھوشن کی گرفتاری اس کا واضح ثبوت ہے۔ پاکستان افغانستان و بلوچستان سے متعلق واضح طور پر اعتراضات اٹھا چکاہے۔ جریدے کے مطابق پاکستان کے اعتراضات درست ہیں۔ بی ایل اے سمیت چند گروپ بھارت کی مدد سے دہشتگرد کارروائی میں ملوث ہیں لیکن پاکستانی سیکیورٹی فورسز ان سے موثر طور پر نمٹ رہی ہیں۔ بھارت اس سے انکارکرتا رہا ہے کہ ریٹائرمنٹ کے بعد کلبھوشن کا ریاست سے کوئی تعلق ہے لیکن گزشتہ اتوار کو بھارتی میڈیا میں شائع ہونے والی ایک رپورٹ میں ”را“ کے حاضر سروس اور ریٹائرڈ افسروں نے تسلیم کیاکہ کلبھوشن پاکستان کے صوبے بلوچستان میں جاسوسی کرتا اور دہشتگردوں کا مکمل نیٹ ورک چلاتا تھا۔
بھارتی جریدے میں یہ رپورٹ شائع ہوئی تو سوشل میڈیا میں بھارتی شہری، سابق اور حاضر سروس اہلکار اور ذمہ دار متحرک ہوگئے اور رپورٹ کو جھوٹا قراردےدیا، محض تین گھنٹے میں چھپی ہوئی خبر کی جریدے کی کاپیاں واپس لے لی گئیں اور سوشل میڈیا اور انٹرنیٹ سے بھی اسے ہٹادیا گیا۔
