ہفتہ باچا خان کا باقاعدہ افتتاح آج پشاور میں ہوگا
پشاور(آن لائن)عوامی نیشنل پارٹی خیبرپختونخوا کے شیڈول کے مطابق ہفتہ باچا خان کا باقاعدہ افتتاح آج سے باچا خان مرکز پشاور میں ہوگا،ہفتہ باچا خان کاا افتتاح صوبائی صدر ایمل ولی خان صبح دس بجے کرینگے،، افتتاحی تقریب کے بعد نوشہرہ امان گڑھ میں باچا خان کی برسی کے مناسبت سے جلسہ عام منعقد ہوگا،امان گڑھ کے جلسہ عام سے مرکزی صدر اسفندیار ولی خان اور دیگر قائدین خطاب کرینگے،جلسہ گاہ میں تیاریوں کو حتمی شکل دے دی گئی ہے جبکہ انتظامات مشہور ایونٹ منیجر ڈی جی بٹ کے پاس ہے۔22جنوری کو بنوں میں جنوبی اضلاع، 25جنوری کو ہزاورہ ڈویژن جبکہ 26جنوری کو ملاکنڈ ڈویژن کا بڑا جلسہ عام بٹ خیلہ میں منعقد ہوگا۔ان تمام بڑے اجتماعات سے اسفندیار ولی خان سمیت پارٹی کے دیگر مرکزی اور صوبائی قائدین باچا خان اور ولی خان کی برسیوں کے حوالے سے خصوصی خطاب کرینگے۔اسی طرح صوبائی صدر ایمل ولی خان کی خصوصی ہدایات پر ہفتہ باچا خان اور ولی خان کی مناسبت سے ہفتہ بھر باچا خان مرکز پشاور میں بھی خصوصی سیمیناروں اور پروگرامات کا انعقاد کیا جائیگا۔21جنوری کو باچا خان مرکز پشاور میں صوبہ بھر کے باچا خان سکولز کے طلباء اور طالبات کا خصوصی پروگرام منعقد ہوگا، 23جنوری کو متبادل تعلیمی نظام اور باچا خان کا تعلیمی نظام کے عنوان سے سیمینار منعقد ہوگا جس میں ممتاز تعلیم دان باچا خان اور خدائی خدمتگاروں کے آزاد سکولز کے حوالے سے خصوصی مقالے پیش کرینگے۔24جنوری کو پی ایس ایف اور طلباء تنظیموں کے عنوان سے سیمینار منعقد ہوگا جبکہ 25جنوری کو قومی تحریک میں خواتین کے کردار کے عنوان سے سیمینار باچا خان مرکز پشاور میں ہوگا۔27جنوری کو باچا خان مرکز پشاور میں ہفتہ کا اختتامی پروگرام منعقد ہوگا،جس میں پارٹی قائدین خصوصی طور پر شرکت کرینگے اور اختتامی پروگرام میں ڈرامہ،کوئز شو کے علاوہ باچا خان امن مشاعرے کے عنوان سے مشاعرہ بھی منعقد ہو گا جس میں صوبہ بھر کے ممتاز شعراء کو دعوت دی جائیگی۔
ہفتہ باچا خان