شرپسند بھیڑ والی جگہوں پر حملہ کرسکتے ہیں,پشاورسمیت خیبر پختونخوا کے کن علاقوں میں دفعہ 144نافذ کر دی گئی ؟ جانیے

پشاور(این این آئی)پشاور میں امن وامان برقرار  رکھنے کے لیے ضلعی انتظامیہ نے دفعہ 144 نافذ کردی۔  دفعہ 144 کے تحت 5 یا اْس سے زائد افرادکے اکٹھے ہونے پر پابندی عائد کی گئی ہے۔اعلامیے کے مطابق 18مارچ سے 22 مارچ تک  دفعہ 144 کا نفاذ رہیگا، خلاف ورزی کی صورت میں کارروائی عمل میں لائی جائے گی۔لکی مروت کے ڈپٹی کمشنر عبدالہادی اور بنوں کے ڈپٹی کمشنر منظور آفریدی نے اپنے اپنے اضلاع میں 5 سے زائد افراد کے جمع ہونے پر 5روز کیلئے پابندی عائد کر دی۔عہدیداروں نے بتایا کہ ضلعی انتظامیہ نے یہ پابندی ان مصدقہ اطلاعات کے موصول ہونے کے بعد لگائی کہ شرپسند بھیڑ والی جگہوں پر حملہ کرسکتے ہیں۔انہوں نے کہاکہ 5روزہ پابندی 23 مارچ تک نافذ العمل رہے گی جسے عوامی مفاد میں توسیع دی جاسکتی ہے۔حکام کے مطابق پابندی کی خلاف ورزی کرنے والوں کے خلاف قانون کے مطابق کارروائی کی جائے گی۔

’مجھے چھوٹی عمر سے ہی یہی شوق تھا‘ عرفی جاوید نے بچپن کا قصہ سنا دیا

دریں اثنا خیبر انتظامیہ نے ضلع بھر میں ہر قسم کے عوامی اجتماعات پر پابندی عائد کر دی۔دفعہ 144 کے نفاذ کا اعلان باڑہ میں جماعت اسلامی کے طے شدہ سیاسی اجتماع سے ایک روز قبل کیا گیا۔خیبر ہاؤس سے جاری ہونے والے نوٹی فکیشن میں کہا گیا کہ خیبر میں سیکیورٹی کی موجودہ صورتحال کے پیش نظر دفعہ 144 نافذ کی گئی ہے، یہ پابندی 6 روز تک برقرار رہے گی تاہم جماعت اسلامی نے ہر قسم کے عوامی اجتماعات پر اچانک پابندی عائد کرنے پر کوئی ردعمل ظاہر نہیں کیا۔