سردار جی کا لطیفہ۔۔۔ فیصلہ تو اعمال کی چینی سے ہو گا :مستنصر حسین تارڑکی تحریر سے اقتباس
”مستنصر حسین تارڑ“کی یادگار تحریر سے اقتباس ملاحظہ کیجیے کہ
ایک سردار جی کے لطیفے نے نہ صرف مجھے چونکا دیا بلکہ مکمل طور پر قائل کر دیا کہ سدا بہار لطیفے دراصل اپنے تصوف کا ایک پوشیدہ پرتو رکھتے ہیں۔
لطیفہ کچھ یوں ہے کہ ایک سردار جی نہایت اہتمام سے چائے پی رہے تھے۔ وہ ایک گھونٹ بھرنے کے بعد چائے کو ایک چمچے سے خوب ہلاتے ، چمچہ چائے میں پھیر کر ایک گھونٹ بھرتے اور پھر مسکرانے لگتے۔ وہ یہ عمل بار بار دُہراتے رہے۔ ہر گھونٹ کے بعد چائے کو چمچے سے ھِلاتے ، ایک اور گھونٹ بھرتے اور مسکرانے لگتے۔
نزدیک بیٹھے ایک صاحب نے پوچھا کہ ، ”سردار جی آپ ہر بار چائے کو چمچے سے ہلا کر گھونٹ بھرنے کے بعد مسکراتے کیوں ہیں؟“
تو سردار جی نے کہا کہ ، ”ایک بات آج ثابت ہو گئی ہے، چائے میں اگر چینی نہ ڈالو تو لاکھ اُسے چمچے سے ہلاؤ وہ کبھی بھی میٹھی نہیں ہو گی“۔
اگر نیک اعمال کی چینی آپ کی حیات میں نہ ہو تو آپ لاکھ عبادتیں کریں ، تسبیح پھیریں ، فیصلہ تو اعمال کی چینی سے ہو گا ورنہ روزِ حشر آپ کی اگلی پوری زندگی پھیکی ہی رہے گی۔
شاہ حسینؒ اور بابا بلھے شاہؒ کے اکثر شعروں میں یہی پیغام ہے ، ”کہ اگر عمل مفقود ہے تو تم پھیکے کے پھیکے رہو گے، کبھی میٹھے نہ ہو گے“۔
اُچیاں بانگاں اوھو دیندے
نیت جنہاں دی کھوٹی ھو
انتخاب : عوامی لکھاری
