فرانزک سائنس اتھارٹی کو جدید خطوط پر استوار کرنے کیلئے فنڈز جاری ، شمالی، وسطی اور جنوبی پنجاب میں نئی لیبز قائم کرنے کا فیصلہ

لاہور ( ڈیلی پاکستان آن لائن ) فرانزک سائنس اتھارٹی کو جدید خطوط پر استوار کرنے کیلئے  فنڈز  جاری ، شمالی، وسطی اور جنوبی پنجاب میں نئی لیبز قائم کرنے کا فیصلہ کر لیا گیا ۔

تفصیلات کے مطابق وزیراعلیٰ پنجاب کی قیادت میں حکومت پنجاب نے فرانزک سائنس کے میدان میں ایک اور سنگ میل عبور کر لیا۔ محکمہ داخلہ پنجاب کی سفارش پر پنجاب فرانزک سائنس اتھارٹی کے تحت شمالی، وسطی اور جنوبی پنجاب میں نئی لیبز قائم کرنے کا فیصلہ کر لیا گیا ہے۔ پنجاب اسمبلی سے منظور شدہ پنجاب فرانزک سائنس اتھارٹی ایکٹ کے تحت دہشت گردی اور سنگین جرائم کے واقعات میں فرانزک سائنس ٹیمیں اب فرسٹ رسپانڈر کے طور پر جائے وقوعہ سے شواہد اکٹھے کریں گی۔ اس حوالے سے عملی اقدامات کیلئے وزیراعلیٰ پنجاب نے فرانزک سائنس اتھارٹی کو جدید خطوط پر استوار کرنے کیلئے 8 ارب روپے کے فنڈز دے دیئے ہیں۔

 وزیراعلیٰ پنجاب کے تاریخ ساز انیشیٹو کے تحت پنجاب فرانزک سائنس اتھارٹی جدید خطوط پر استوار ہوگی۔ ترجمان محکمہ داخلہ پنجاب کے مطابق فرانزک سائنس ایجنسی کو اتھارٹی کا درجہ دے کر ادارے میں غیر معمولی اصلاحات لائی جارہی ہیں۔ نئے قانون میں فرانزک سائنس اتھارٹی کو کرائم سین کے تحفظ اور فرانزک مواد کی نقل و حمل کا مینڈیٹ دیا گیا ہے۔ ترجمان نے بتایا کہ اس عمل سے ناصرف کام کے معیار میں بہتری آئے گی بلکہ عدالت میں موثر استغاثہ کو یقینی بنایا جاسکے گا۔ منصوبے کے مطابق پنجاب بھر میں اتھارٹی کے اپڈیٹڈ دفاتر اور لیبز کے قیام سے ان علاقوں کے کیسز کو وہیں ڈیل کیا جاسکے گا۔

ترجمان نے بتایا کہ صوبے کے تمام حصوں میں اتھارٹی دفاتر کی موجودگی اور قابل ہیومن ریسورس کی بدولت بروقت رپورٹس حاصل ہونگی۔ یاد رہے کہ نئے منظور شدہ قانون کے مطابق وزیراعلیٰ پنجاب فرانزک سائنس اتھارٹی بورڈ کی سربراہ ہوں گی جبکہ اتھارٹی کیلئے ایک وائس چیرپرسن کی تعیناتی کریں گی۔ حکومت کی مکمل اور فوری سپورٹ یقینی بنانے کیلئے تمام متعلقہ محکموں کو اتھارٹی بورڈ میں شامل کیا گیا۔ فوری فیصلہ سازی اور عملدرآمد کیلئے سیکرٹری محکمہ داخلہ، سیکرٹری فنانس، چیئرمین پلاننگ اینڈ ڈویلپمنٹ بورڈ، سیکرٹری قانون، سیکرٹری پراسکیوشن اور آئی جی پنجاب اتھارٹی بورڈ کے ممبرز بنائے گئے ہیں۔ اسی طرح فرانزک سائنس کی فیلڈ سے 5 ماہرین کو بھی اتھارٹی بورڈ کا حصہ بنایا گیا ہے۔ ترجمان نے بتایا کہ وزیر اعلیٰ پنجاب نے اتھارٹی کیلئے جدید ترین آلات، انفراسٹرکچر اور عمارتوں کی تعمیر و اپ گریڈیشن کیلئے 8 ارب کے فنڈز منظور کیے ہیں۔