تھائی لینڈ میں مارشل لا نافذ،فوج اہم تنصیبات پر قابض
بنکاک(مانیٹرنگ ڈیسک )تھائی لینڈ میں گزشتہ 6 ماہ سے جاری سیاسی بحران کے بعد فوج نے ملک میں مارشل لا نافذ کر تے ہوئے سرکاری میڈیا سمیت اہم تنصیبات پر قبضہ کر لیا ہے۔تھائی فوج نے مارشل لا کے بعد ملک کی سرکاری میڈیا سروس کو بھی اپنی تحویل میں لے لیا ہے جب کہ سڑکوں پر فوج نے گشت شروع کر دیا ہے۔ ملک میں مارشل لا کے نفاذ کے بعد فوج کو احکامات نافذ کرنے کے لیے وسیع اختیارات حاصل ہو گئے ہیں۔غیر ملکی خبر رساں ادارے کے مطابق تھائی فوج کا سرکاری ٹی وی پر نشر ہونے والے بیان میں کہنا تھا کہ ملک میں حکومت اور حزب اختلاف کے درمیان گزشتہ کئی ماہ سے جاری کشمکش اور سیاسی بحران کے بعد مارشل لاءنافذ کیا جا رہا ہے، ملک میں جاری سیاسی بحران سے عوام کی جان و مال کو خطرہ لاحق ہو سکتا ہے اور ملک کی سلامتی بھی خطرے میں پڑ سکتی ہے، سیکیورٹی کی ذمہ داریاں سنبھالنے کو بغاوت سے تعبیر نہیں کیا جا سکتا۔ دوسری جانب تھائی لینڈ کے عبوری وزیر اعظم کے چیف سیکیورٹی ایڈوائزر کا کہنا ہے کہ فوج کے فیصلے کے بارے میں حکومت کو اعتماد میں نہیں لیا گیا ،فوج کے ایک ترجمان نے کہا ہے کہ مارشل کے نفاذ سے نگران حکومت پر کوئی اثر نہیں پڑے گا اور وہ اقتدار میں رہے گی۔واضح رہے کہ تھائی لینڈ میں اس سے قبل 2006 ءمیں فوج نے ملک میں مارشل لا نافذ کر کے اقتدار پر قبضہ کر لیا تھا۔
