رُودادِ گلستاں میں بیاں کس طرح کروں ۔۔۔ہر برگِ گل سے دُشمنی اب باغباں کی ہے
جو جانِ بیقرار ہے، وہ زخمِ جاں کی ہے
خوشبو بھی میری خاک میں کوۓ بُتاں کی ہے
شاعر وہ کیا جو حسن کی پُوجا نہ کر سکے
تصویر بھی جبیں پہ مری مہ وشاں کی ہے
برداشت کرنی پڑتی ہیں نازُک مزاجیاں
برقِ تپاں سے دوستی اب آشیاں کی ہے
رُودادِ گلستاں میں بیاں کس طرح کروں
ہر برگِ گل سے دُشمنی اب باغباں کی ہے
کیا ہو گئی ہے شُعلہ و شبنم میں دوستی؟
کیوں موجِ مے میں آگ سی سوزِ نہاں کی ہے؟
یہ شورِ حشر ہے کہ فغانِ ستم کشاں
یا یہ نواۓ درد کسی بے زباں کی ہے
اہلِ زمیں شریک ہیں سازش میں جعفری
میں کیسے مان لوں یہ جفا آسماں کی ہے
کلام : مقصود جعفری ( اسلام آباد )
