پیپلز پارٹی عام انتخا بات میں اکثریت حاصل کریگی ، الیکشن کمیشن پر مکمل اعتماد : آصف زرداری 

                                                                        کراچی ( مانیٹرنگ ڈیسک ، نیوز ایجنسیاں) سابق صدر آصف زرداری کا کہنا ہے مجھے الیکشن کمیشن پر پورا اعتمادہے وہ شفاف الیکشن کرائےگا ، ملک شفاف انتخابات کی طرف جارہا ہے۔ اپنے بیان میں۔آصف زرداری نے کہا کہ پیپلز پارٹی واحد جماعت ہے جو ہر ماحول میں الیکشن لڑنے کی صلاحیت رکھتی ہے، پورا یقین ہے کہ 8 فروری کو پیپلز پارٹی ملک کی اکثریتی پارٹی بن کر سامنے آئے گی۔سابق صدر نے کہا کہ ملک کا ماحول اس وقت انتخابات کیلئے سازگار ہے اور الیکشن وقت پر ہونے چاہئیں۔یاد رہے کہ الیکشن کمیشن کی جانب سے 8 فروری کو ملک میں عام انتخابات کا اعلان کیا گیا ہے اور کراچی سے پشاور تک تقریباً تمام سیاسی جماعتوں نے الیکشن مہم کا آغاز بھی کر دیا ہے۔مختلف سیاسی جماعتوں کی جانب سے الیکشن میں لیول پلیئنگ فیلڈ نہ ملنے کے دعوے کیے جا رہے ہیں جبکہ سیاسی جماعتوں کی جانب سے ووٹرز کی توجہ حاصل کرنے کے لیے ایک دوسرے پر تنقید بھی کی جا رہی ہے۔گزشتہ روز بھی پاکستان پیپلز پارٹی کے چیئرمین بلاول بھٹو زرداری نے پشاور میں جلسے سے خطاب کرتے ہوئے کہا کہ اگر کوئی سمجھتا ہے کہ وہ زبردستی کسی کو وزیراعظم بنا سکتے ہیں تو یہ غلط فہمی ہے۔دوسری جانب پاکستان مسلم لیگ ن پنجاب کے صدر رانا ثنا ءاللہ نے دعویٰ کیا کہ ن لیگ پنجاب میں قومی اسمبلی کی 141 میں سے 125 نشستیں جیتے گی اور اکثریت سے وفاق میں حکومت بنائے گی۔دوسری طرف پیپلزپارٹی پارلیمنٹرینز کے صدر آصف علی زرداری سے ایران کے سفیر رضا امیری مقدم نے ملاقات کی۔آصف علی زرداری سے ملاقات کے دوران ایرانی سفیر کے ساتھ قونصل جنرل حسن نوریان بھی موجود تھے، آصف زرداری اورایرانی سفیررضا امیری مقدم کے درمیان دوطرفہ تعلقات کے فروغ پربات چیت ہوئی۔سابق صدر اور ایرانی سفیر کے درمیان دوطرفہ تجارتی تعلقات میں اضافے پر بھی اتفاق ہوا، ملاقات کے موقع پر سینیٹر سلیم مانڈوی والا بھی موجود تھے۔

آصف زرداری