چیف جسٹس پاکستان کا صدر مملکت کو خط، انٹرنیشنل اسلامک یونیورسٹی کی انتظامیہ کیخلاف تحقیقات کا مطالبہ
اسلام آباد(ڈیلی پاکستان آن لائن)چیف جسٹس پاکستان جسٹس قاضی فائز عیسیٰ نے انٹرنیشنل اسلامک یونیورسٹی کی انتظامیہ کیخلاف تحقیقات کا مطالبہ کر دیا،چیف جسٹس پاکستان نے صدر، چیئرمین ایچ ای سی اور وفاقی وزارت تعلیم کا خط لکھ دیا،خط کی کاپی چیف جسٹس شریعت کورٹ اور یونیورسٹی انتظامیہ کو بھی ارسال کی گئی ہے،چیف جسٹس پاکستان نے وائس پریذیڈنٹ نبی بخش جمانی کی تعیناتی پر شدید تحفظات کااظہار کیا ہے۔
نجی ٹی وی چینل دنیا نیوز کے مطابق خط میں کہا گیا ہے کہ انٹرنیشنل اسلامک یونیورسٹی بدانتظامی کی وجہ سے بین الاقوامی معیار کھو چکی ہے،سالوں سے جاری بدانتظامی کے باعث یونیورسٹی میں اسلامی اقدار بھی ختم ہو چکی ہیں،چیف جسٹس پاکستان نے خط کے متن میں کہاکہ میری درخواست پر 3سال بعد صدر مملکت نے 30نومبر کو بورڈ ممبرز کا اجلاس بلانے کاکہا،وائس پریذیڈنٹ نبی بخش جمانی نے میرے دو خطوط کا جواب تک نہیں دیا،22ستمبر اور 13اکتوبر کو یونیورسٹی انتظامیہ سے متعلق خطوط کا جواب نہیں دیاگیا۔
خط میں مزید کہا گیا ہے کہ نبی بخش جمانی کی تعیناتی 3سال کیلئے تھی مگر وہ تاحال عہدے پر براجمان ہیں،بورڈ آف ٹرسٹیز اجلاس بلا کر یونیورسٹی کے معاملات کا جائزہ لیں،اجلاس میں وائس پریذیڈنٹ کی تعیناتی اور میرے خطوط بھی سامنے رکھے جائیں۔
