باپ کے سینے پہ اک پھول کا لاشہ دیکھا۔۔۔( فلسطین میں بچوں کے قتلِ عام پر جذبات کا اظہار)
شبِ ظلمت میں یہ آنکھوں نے تماشا دیکھا
چاند نکلا تو ہر اک سمت اندھیرا دیکھا
میں نے دیوار پہ اک سایہ تو دیکھا لیکن
پسِ دیوار مگر اور بھی سایہ دیکھا
ہر رگِ گل سے ٹپکتا ہوا خوں دیکھا ہے
مُجھ کو صیاد نے جو کُچھ بھی دکھایا دیکھا
روزِ محشر سے بھی پہلے یہ قیامت دیکھی
باپ کے سینے پہ اک پھول کا لاشہ دیکھا
شکلِ انساں میں کئی بھیڑئیے دیکھے مَیں نے
خوں سے لبریز مری آنکھوں نے کیا کیا دیکھا
مسجدوں پر بھی ہوئی جاتی ہے گولہ باری
یہ تماشا ہے ؟ تو پھر مَیں نے تماشا دیکھا
جعفری جاگا نہیں سویا ضمیرِ مغرب
شہرِ خاموشاں میں مغرب کاجنازہ دیکھا
کلام :ڈاکٹر مقصود جعفری (اسلام آباد)
 ){kind=link}