سعودی عرب میں پاکستانی ڈاکٹرز نے کمال کردیا ، ایک ہزار افراد کا مفت علاج

ریاض(مانیٹرنگ ڈیسک) سعودی عرب کے دارالحکومت ریاض میں پاکستانی ڈاکٹرز گروپ (پی ڈی جی)کی طرف سے قائم کردہ فری میڈیکل کیمپ میں ایک ہزار افراد کا مفت علاج کیا گیا۔ عرب نیوز کے مطابق اس فری میڈیکل کیمپ میں 300کے لگ بھگ ڈاکٹروں نے فرائض سرانجام دیئے۔
رپورٹ کے مطابق پی ڈی جی سعودی عرب میں پاکستانی ڈاکٹروں کی ایک فلاحی تنظیم ہے۔ اس گروپ کا کہنا ہے کہ پاکستان اور سعودی عرب کے مابین پیشہ وارانہ اور سماجی تعلقات کو مضبوط تر کرنا ان کا نصب العین ہے۔ گروپ کی طرف سے فری میڈیکل کیمپ کا انعقاد گزشتہ جمعة المبارک کے روز کیا گیا، جس میں انہیں پاکستانی سفارتخانے کا تعاون بھی حاصل تھا۔
پی ڈی جی کے صدر ڈاکٹر اسد اللہ رومی کا اس حوالے سے کہنا تھا کہ ”پاکستانی سفارتخانے میں قائم کیے گئے اس فری میڈیکل کیمپ میں ایک ہزار سے زائد لوگوں کا مفت چیک اپ کیا گیا۔اس سال کے فری میڈیکل کیمپ میں ہماری توجہ لوگوں کی ذہنی صحت کی بہتری پر مرکوز رہی۔ اس حوالے سے ہم نے کئی ورکشاپس کا اہتمام بھی کیا۔“