دل نے چاہا تھا کہ ہو آبلہ پائی رخصت| کشور ناہید|
دل نے چاہا تھا کہ ہو آبلہ پائی رخصت
زندگی دے کے ہوئی شعلہ فشانی رخصت
تم نے جب شمع بجھائی تو سمجھ میں آیا
ایک موہوم سا رشتہ تھا سو وہ بھی رخصت
میں اداسی سرِ بازار بھی لاؤں ایسے
جیسے پانی کی تمنا میں ہو کشتی رخصت
تیری تائید کی تصویر سے جی اٹھے تھے
نہیں معلوم تھا ،یہ ریت ہے، پانی رخصت
میں حوالہ تِری تحریر کا کس نام سے دوں
مجھ سے تو مانگ چکا حرفِ تعلی رخصت
شاعرہ: کشور ناہید
( شعری مجموعہ:آباد خرابہ؛سالِ اشاعت،2016)
Dil Nay Chaaha Tha Keh Ho Aabla Paai Rukhsat
Zindagi Day K Hui Shola Fashaani Rukhsat
Tum Nay Jab Shama Bujhaai To Samjh Men Aaya
Aik Mohoom Sa Rishta Tha So Wo Bhi Rukhsat
Main Udaasi Sar-e-Bazaar Bhi Laaun Aisay
Jaisay Paani Ki Tamanna Men Ho Kashti Rukhsat
Teri Taeed Ki Tasveer Say Ji Uthay Thay
Nahen Maloom Tha Yeh Rait Hay Paani Rukhsat
Main Hawaala Tiri Tehreer Ka Kiss Naam Say Dun
Mujh Say To Maang Chuka Harf-e-Taali Rukhsat
Poetess: Kishwar Naheed