صائمہ فتح نرسنگ سپرنٹنڈنٹ جنرل ہسپتال تعینات

لاہور(جنرل رپورٹر) جنرل ہسپتال کی نرس صائمہ فتح کو گریڈ 18 میں نرسنگ سپریٹنڈنٹ تعینات کر دیا گیا۔چارج سنبھالنے کے بعد انہوں نے پرنسپل امیرالدین میڈیکل کالج پروفیسر ڈاکٹر فاروق افضل اور میڈیکل سپرنٹنڈنٹ ڈاکٹر فریاد حسین سے ملاقات کی۔ پرنسپل نے انہیں مبارکباد دیتے ہوئے ہدایت کی کہ نرسنگ اسٹاف کی حاضری، نظم و ضبط اور مریضوں کی نگہداشت میں بہتری کو یقینی بنایا جائے۔

 ڈاکٹر فاروق افضل نے کہا کہ وزیراعلیٰ پنجاب محترمہ مریم نواز کے ہیلتھ ویڑن کے مطابق مریضوں کو معیاری طبی سہولیات فراہم کرنا ترجیحی ہدف ہے، جس میں نرسنگ سروسز کا کردار کلیدی ہے۔ انہوں نے مزید کہا کہ اعلیٰ تعلیم اور مسلسل تربیت ہی کامیابی کی کنجی ہیں۔صائمہ فتح نے یقین دہانی کرائی کہ وہ نرسنگ نظم و نسق اور سروس کو جدید تقاضوں سے ہم آہنگ بنانے کے لیے اپنی قائدانہ صلاحیتیں بروئے کار لائیں گی۔ انہوں نے کہا کہ وہ ٹیم ورک پر یقین رکھتی ہیں اور مریضوں کی بہتر نگہداشت کے لیے تمام نرسنگ اسٹاف کو ساتھ لے کر چلیں گی۔واضح رہے کہ صائمہ فتح نے پنجاب نرسنگ بورڈ کے امتحانات میں Midwifery میں پہلی پوزیشن حاصل کر کے نمایاں تعلیمی کامیابی حاصل کی تھی۔