”ہم یہ کام کرنا چاہتے ہیں“ شان مسعود کا بیان پڑھ کر آپ بے اختیار کہیں گے ”بھارت کیخلاف میچ دیکھ کر تو بالکل ایسا نہیں لگتا“

دبئی (ڈیلی پاکستان آن لائن) قومی کرکٹر شان مسعود نے کہا ہے کہ پاکستانی ٹیم ایشیاءکپ کا فائنل کھیلنا چاہتی ہے، افغانستان کو کسی بھی طرح آسان حریف نہیں سمجھتے کیونکہ ان کے سپنرز کی خاص طور پر باﺅلنگ بہت اچھی ہے۔
آئی سی سی اکیڈمی میں پریکٹس سیشن کے بعد میڈیا سے گفتگو کرتے ہوئے شان مسعود نے کہا کہ افغانستان نے بھی ہماری طرح یہاںبہت ساری کرکٹ کھیلی ہے اور ان کے سپنرز کی خاص طور پر باﺅلنگ بہت اچھی ہے،افغانستان نے تو سری لنکا کو ٹورنامنٹ سے ہی باہر کر دیا حالانکہ گزشتہ سال سری لنکا نے ہمارے ساتھ سخت مقابلہ کیا تھا۔
انہوں نے کہا کہ ہمیں اندازہ تھا کہ ایک میچ جیت کر سپر فور میں جگہ بنا سکتے ہیں لیکن اب ہمارے پاس مزید غلطی کی گنجائش نہیں ہے، اگلے میچوں میں بہترین کارکردگی کا مظاہر دکھائیں گے کیونکہ پاکستان کرکٹ ٹیم ایشیاءکپ کا فائنل کھیلنا چاہتی ہے۔
ایک سوال کے جواب میں انہوں نے کہا کہ امام الحق اور فخر زمان پاکستان کی جانب سے اوپننگ کے شعبے میں اچھی کارکردگی دکھا رہے ہیں۔ امام نے ابتدائی 10 میچوں میں چار ون ڈے سنچریاں بنائیں لیکن ہوسکتا ہے کہ بھارت کے خلاف پہلا میچ کھیلتے ہوئے وہ اپنے اعصاب پر قابو نہیں پاسکے ہوں۔
انہوں نے کہا کہ امام الحق غیر معمولی صلاحیتوں کا مالک کھلاڑی ہے، پاکستان270 سے 280 رنز بناکرمیچ جیت سکتا تھا لیکن کریڈٹ بھارتی باﺅلرز کو جاتا ہے جنہوں نے ہمیں غلطیوں پر مجبور کیا۔