عمر گل کا میچ فکسنگ کی پیش کش کا انکشاف

 اسلام آباد(آئی این پی)سابق پاکستانی فاسٹ بولر عمر گل نے دو سے تین مرتبہ بکیز کی طرف سے میچ فکسنگ کی پیش کش کا انکشاف کردیا۔انہوں نے بتایا کہ کبھی بھی ناخن یا دانت یا کسی اور طریقے بال ٹیمپر نہیں کی بلکہ پچ دیکھ کر اندازہ ہوجاتا تھا کہ ڈرائے ہے یا کیسی ہے پھر اسی کے ذریعے بال کو ٹیمپر کرکے ریورس سوئنگ کرتا تھا۔سابق پاکستانی کھلاڑی نے انکشاف کیا کہ انہیں دو سے تین مرتبہ بکیز کی جانب سے میچ فکسنگ کی پیش کش ہوئی ہے لیکن انہوں نے ہر مرتبہ انکار کرکے معاملہ آگے رپورٹ کردیا، عمر گل نے بتایا کہ پہلی مرتبہ انہیں 2010 میں کولمبو میں دو بھارتی شہریوں نے میچ فکسنگ کی پیش کش کی تھی۔انہوں نے بتایا کہ اس سال فواد عالم نے ڈیبیو کیا تھا اور ہمارے فلور پر دو بھارتی شہری تھے جو مجھے شروع سے ہی بکیز لگ رہے تھے۔عمر گل نے کہا کہ ایک دن میں اور فواد لوبی میں اسنوکر کھیل رہے تھے کہ وہ دونوں افراد بھی آگئے اور ہمارے ساتھ اسنوکر کھیلنے کی خواہش ظاہر کی، ہم نے ان کے ساتھ اسنوکر کھیلا اور پھر ہم وہاں سے چلے گئے دوبارہ مجھ سے ملے اور مجھے میچ فکسنگ کی پیش کی جس پر میں نے فوری طور پر مسترد کرتے ہوئے بورڈ کے اعلی حکام کو رپورٹ کردی۔