کثیر القومی مشق برائٹ سٹا ر اختتام پذیر، پاکستان سمیت 20ممالک نے حصہ لیا 

 
 راولپنڈی(آئی این پی)ہائبرڈ خطرات سے نمٹنے کے طریقہ کار کو مزید بہتر کرنے کے لیے فوجی مشق برائٹ سٹار 2021مصر میں اختتام پذیر ہو گئی۔پاک فوج کے شعبہ تعلقات عامہ (آئی ایس پی آر)کی جانب سے جاری بیان میں بتایا گیا ہے کہ کثیر القومی مشق برائٹ سٹار 2021محمد ناگیب ملٹری بیس مصر میں ہوئی، مشق میں 20ممالک بشمول مصر، امریکا، پاکستان، برطانیہ، سعودی عرب، تیونس، فرانس اور اردن نے حصہ لیا۔ اس کے علاوہ قبرص، عراق، بحرین، سوڈان، مراکش، کینیا، اٹلی اورسپین کی افواج نے بھی مشق میں حصہ لیا۔آئی ایس پی آر کے مطابق دو ہفتوں پر مشتمل مشق کا مقصد ہائبرڈ خطرات سے نمٹنے کے طریقہ کار کو مزید بہتر کرنا تھا، مشق سے علاقائی امن کے لیے بحری سکیورٹی آپریشنز مزید مضبوط ہوں گے۔شعبہ تعلقات عامہ کے مطابق مشق کی اختتامی تقریب محمد ناگیب ملٹری بیس مصر میں منعقد ہوئی جس میں مصری وزیر دفاع اور کمانڈر انچیف جنرل محمد ذکی سمیت 20ممالک کے فوجی حکام بھی موجود تھے۔آئی ایس پی آر کے مطابق مشق میں ہوائی جہازوں، ہیلی کاپٹروں اور ٹینکوں سمیت مختلف ہتھیاروں کا استعمال کیا گیا، مشق برائٹ اسٹار 1980سے باقاعدگی سے منعقد کی جا رہی ہے۔
 مشق برائٹ سٹار