احرام کے تولیوں میں آئس سعودی عرب اسمگل کرنے کی کوشش ناکام
اسلام آباد(ڈیلی پاکستان آن لائن) نیواسلام آباد انٹرنیشنل ایئر پورٹ پر اے ایس ایف نے آئس کی بھاری مقدار سعودی عرب اسمگل کرنے کی کوشش ناکام بنادی، احرام کے تین تولیوں کو آئس کے محلول سے بھگو کر سامان میں رکھا گیا تھا۔
تفصیلات کے مطابق نیواسلام آباد انٹرنیشنل ایئرپورٹ پر اسلام آباد سے استنبول اور پھر جدہ سعودی عرب جانے والی پرواز کی بریفنگ جاری تھی کہ عمران نامی مسافر سامان کے ہمراہ سفر کے لیے ایئرپورٹ پہنچا جہاں اے ایس ایف نے مسافر کا سامان چیک کیا تو سامان میں رکھے گئے احرام کے تولیے مشکوک قرار دیے گئے۔
چیک کرنے پر پتہ چلا کہ تین تولیے آئس کے محلول میں بھیگے ہوئے ہیں، حکام کا کہناتھا کہ تولیوں سے 5 کلو 448 گرام آئس کا محلول برآمد ہوا جس کو قبضے میں لے لیا گیا۔
حکام کے مطابق ابتدائی چھان بین اور قانونی کارروائی مکمل کرنے کے بعد ملزم اور آئس میں بھیگے تولیے مزید تحقیقات کے لیے اینٹی نارکوٹکس فورس کے حوالے کردیے گئے۔
