20لاکھ سے زائد پاکستانیوں کا ڈیٹا چوری،ہیکرز نے سیل لگادی
کراچی (ڈیلی پاکستان آن لائن)ہیکرز نے پاکستانی شہریوں کا سافٹ ویئر پر استعمال ہونے والا ڈیٹا چوری کرلیا۔ ہوا کچھ یوں کہ ہیکرز نے ریسٹورنٹس میں استعمال ہونے والاسافٹ وئیر ہیک کیا اور 20 لاکھ سے زائد پاکستانیوں کا ذاتی ڈیٹا چوری کرکے انٹرنیٹ پرفروخت کیلئے دستیاب ہے۔
ہیکرز کی جانب سے انٹرنیٹ پر ’’ڈیٹا برائے فروخت ‘‘کا اشتہار بھی دے دیا جس میں پاکستانیوں کا پرسنل ڈیٹا سیمپل کے طورپر دکھایا گیا ہے۔
ہیکرز کا اپنے پیغام میں کہنا ہے کہ انہوں نے 250 سے زائد ریسٹورنٹس کا کسٹمر ڈیٹا بیس ہیک کرلیا ہے، شہریوں کے کریڈٹ کارڈ نمبرز اور موبائل نمبرز کا ڈیٹا بھی سیمپل میں موجود ہے۔اشتہار میں چھوٹے بڑے درجنوں ریسٹورنٹس کے نام بھی موجود ہیں۔ مخصوص سافٹ ویئرپاکستان میں سیکڑوں ریسٹورنٹس استعمال کرتے ہیں۔کس شہری نے کس ریسٹورنٹ میں کتنی بار اور کتنی ادائیگی کی، سارا ڈیٹا انٹرنیٹ پر موجود ہے۔انٹرنیٹ پربرائے فروخت 22 لاکھ شہریوں کے ڈیٹاکی قیمت2 بٹ کوائن مانگی جارہی ہے۔
مارکیٹ ذرائع کے مطابق ایک بٹ کوائن کی قیمت 27 ہزار ڈالر ہے، پاکستانی روپوں میں دو بٹ کوائن کی مالیت ڈیڑھ کروڑ روپے سے زائد بنتی ہے۔اس حوالے سے ایف آئی اے کے سائبرکرائم سرکل کا کہنا ہے کہ معاملے سےمتعلق تاحال کوئی شکایت موصول نہیں ہوئی۔
