سکھر (ویب ڈیسک) تحصیل صالح پٹ کے علاقے میں کھیت میں گھس کر پانی پینے پر با اثر وڈیرے نے مبینہ طور پر بے زبان اونٹنی کو بد ترین تشدد کا نشانہ بنایا جس سے اس کی ٹانگ ٹوٹ گئی اور مالک کا دعویٰ ہے کہ زخمی اونٹنی کو ٹریکٹرکیساتھ باندھ کر گھسیٹا گیا، اب اس بے زبان مضروبہ کوکراچی منتقل کردیاگیا۔
جیونیوز کے مطابق اونٹنی کے مالک کاکہناہے کہ وڈیرے نے غصے میں اونٹنی کو ٹریکٹر سے باندھ کرگھسیٹا اور منہ پر ڈنڈے بھی مارے۔ زخمی اونٹنی کاعلاج کرانے ہسپتال پہنچے تو ڈاکٹروں نےانکار کردیا، زمین بھی غیرآباد تھی جہاں کوئی فصل ہی نہیں تھی ۔
کندھرا پولیس نے اونٹنی مالک کی مدعیت میں واقعے کا مقدمہ درج کرلیااوربتایا کہ مقدمے میں نامزد 3 ملزمان میں سے ایک کو گرفتار کرلیا گیا جبکہ دیگر کی گرفتاری کےلیے چھاپے مارے جار ہے ہیں۔
وزیر اعلیٰ سندھ مراد علی شاہ نے واقعے کا نوٹس لیتے ہوئے میئر سکھر سے رپورٹ طلب کر لی اور کہاہے کہ جانور کے ساتھ اس طرح کاسلوک کسی صورت برداشت نہیں کیا جاسکتا، ساتھ ہی چیئرمین ڈسٹرکٹ کونسل سکھر کو اونٹنی کا علاج کرانے کی ہدایت کردی۔چیئرمین ڈسٹرکٹ کونسل کے مطابق ابتدائی علاج کے بعد اونٹنی کو فوری کراچی روانہ کیا گیا ہے ۔