سی ٹی او کا ٹریفک نظام کا جائزہ لینے کیلئے شہر کا دورہ
پشاور(کرائم رپورٹر) چیف ٹریفک آفیسر عباس مجید خان مروت نے رمضان المبارک کے دوران شہر میں ٹریفک نظام کو رواں دواں رکھنے ٹریفک قوانین پر عملدرآمد یقینی بنانے کیلئے گزشتہ روز شہر کے مختلف مقامات کا دورہ کیا۔ دورے کے دوران ڈی ایس پی حیات آباد لیاقت خان اور دیگر ٹریفک افسران بھی ان کے ہمراہ تھے۔ چیف ٹریفک آفیسر عباس مجید خان مروت نے ٹریفک کی روانی اور سٹی ٹریفک پولیس پشاور کی جانب سے تجاوزات مافیا کے خلاف کی جانیوالی کارروائیوں کے نتیجے میں آنیوالی بہتری کا جائزہ لیا جبکہ سڑک کو ہر قسم کی ٹریفک کیلئے کلیئر کرنے پر ٹریفک افسران اور وارڈنز کی کارکردگی کی تعریف کی اور ٹریفک حکام کو ہدایت کی کہ وہ روزانہ کی بنیاد پر تجاوزات مافیا کے خلاف کارروائیاں کریں تاکہ شہریوں کو کسی قسم کے مشکلات درپیش نہ ہوں۔ انہوں نے کہا کہ رمضان المبارک کے دوران شہریوں کو سفری سہولیات فراہم کرنے کیلئے نو پارکنگ زون کی خلاف ورزی کرنیوالوں کیخلاف سخت کارروائی عمل میں لائی جائے۔ انہوں نے ٹریفک حکام کو ہدایت کی کہ وہ افطاری سے پہلے اور نماز تراویح کے دوران ٹریفک کی روانی کو برقرار رکھیں اور بازاروں کو جانیوالی روٹس کو ہر قسم کی ٹریفک کیلئے کلیئر رکھیں۔ انہوں نے کہا کہ ٹریفک عملہ فٹ پاتھوں کو تجاوزات مافیا سے واگزار کرائیں تاکہ پیدل چلنے والوں کو بھی کسی قسم کے مشکلات درپیش نہ ہوں اس سلسلے میں کسی کے ساتھ نرمی نہ برتی جائے۔ چیف ٹریفک آفیسر عباس مجید خان مروت نے کہا ہے کہ بلا تعطل ٹریفک کی روانی بہتر بنانے کے لئے تمام تر صلاحیتیں بروئے کار لائی جائیں اور اس سلسلے میں کسی قسم کی غفلت برداشت نہیں کی جائیگی۔ انہوں نے مزید کہا کہ ٹریفک پولیس افسران اور اہلکار پہلے سلام پھر کلام کی پالیسی پر عمل پیرا ہو کر شہریوں کو بہتر خدمات کی فراہمی یقینی بنائیں۔ انہوں نے کہا کہ سٹی ٹریفک پولیس کا عملہ شہر بھر میں ٹریفک قوانین اور تجاوزات کے خاتمے کیلئے آگاہی کا سلسلہ جاری رکھیں کیونکہ اس کے بہتر نتائج سامنے آرہے ہیں۔ انہوں نے کہا کہ تاجر برادری شہر سے تجاوزات کے خاتمے اور ٹریفک کی روانی کو یقینی بنانے کے لئے ٹریفک عملے کے ساتھ تعاون کرے۔
