ڈرامہ سیریل ’’زہریلی‘‘میں کیرئیر کا یادگار کردار ادا کررہی ہوں،شین

ڈرامہ سیریل ’’زہریلی‘‘میں کیرئیر کا یادگار کردار ادا کررہی ہوں،شین
 ڈرامہ سیریل ’’زہریلی‘‘میں کیرئیر کا یادگار کردار ادا کررہی ہوں،شین

  

لاہور(فلم رپورٹر) معروف اداکارہ و ماڈل شین نے کہا ہے کہ شوبزکی چمکتی دمکتی دنیا بڑی ہی عجیب ہے۔ عام طورپر یہاں سب کچھ اچھا اورخوابوں کی طرح دکھائی دیتا ہے، لیکن حقیقت میں ایسا نہیں ہے۔ مگر اس کے باوجود کرداروں میں حقیقت کا رنگ بھرکر لوگوں کے اداس چہروں پر مسکراہٹ لانے والا ہی منجھا ہوا فنکارکہلاتا ہے۔شین نے کہا کہ میں نے اپنے طویل فنی سفرکے دوران بہت سے انوکھے اور منفرد کردار نبھائے اور لوگوں کوخوب انٹرٹین کیا۔ اس کے لئے میری کڑی محنت نے اہم کردارادا کیا، جو زندگی کے تمام شعبوں میں آگے بڑھنے کے لیے بے حد ضروری ہوتی ہے۔ ڈرامہ سیریل ’’زہریلی‘‘میں اپنے کیرئیر کا یادگار کردار ادا کررہی ہوں۔ اس لئے کامیابی کے میدان میں آگے بڑھنے اوراس کامیابی کو وہی لوگ برقرار رکھ پاتے ہیں، جومحنت اورلگن کے جذبے سے سرشار ہوتے ہیں۔

یہی وجہ ہے کہ فلمی دنیا میں جب قدم رکھا توپھر کامیابیوں نے میرے قدم چومے۔دوسری جانب فلموں کی کامیابی میں میرے چاہنے والوں کی دعاؤں کا بھی بہت عمل دخل شامل ہے۔ انھوں نے کہا کہ پاکستان فلم انڈسٹری میں بہت سے یادگارکردارنبھائے بلکہ پاکستانی فلموں پرراج کرنے والے تمام فنکاروں کے ساتھ کام کیا اوراپنے سینئرز سے بہت کچھ سیکھا۔ میں سمجھتی ہوں کہ انسان کوسیکھنے کا عمل ہمیشہ جاری رکھنا چاہیے، جولوگ سیکھنے کا عمل روک دیتے ہیں، وہ پیچھے رہ جاتے ہیں۔ میں دنیا کے کسی بھی مقام پرکام کیلئے جاؤں یا سیروتفریح کے لیے، مگرسیکھنے کا عمل جاری رہتا ہے۔ایک فنکارکے لیے تویہ سب بہت ضروری ہوتا ہے کیونکہ ایک فنکار معاشرے کے مختلف کرداروں کی عکاسی کرتے ہوئے ان میں حقیقت کے رنگ بھرتا ہے وہ صرف فلم کو ہی کامیاب نہیں بناتا بلکہ اس کایہ انداز اس کو فلم بینوں کے قریب لاتا اور اس کردارکو فلم بینوں کی زندگی کا ایک حصہ بنا دیتا ہے۔

مزید : کلچر