کیا مولانا سے دھرنا ختم کراتے وقت کے وعدے خیبر پختونخوا بلدیاتی الیکشن میں پورے ہوئے؟ عامر لیاقت میدان میں آگئے
اسلام آباد (ڈیلی پاکستان آن لائن) پاکستان تحریک انصاف (پی ٹی آئی) کے رکنِ قومی اسمبلی عامر لیاقت حسین نے دعویٰ کیا ہے کہ مولانا فضل الرحمان خیبر پختونخوا میں بلدیاتی الیکشن اس لیے جیتے ہیں کیونکہ ان سے دھرنا ختم کراتےوقت کیے جانے والے وعدے پورے کیے گئے ہیں۔
اپنے ایک ٹویٹ میں عامر لیاقت نے کہا کہ جس وقت مولانا فضل الرحمان نے اسلام آباد میں دھرنا دیا تھا اس وقت ان کی ایک ملاقات ہوئی تھی اور کسی سے فون پر بھی بات ہوئی تھی جس کے بعد انہوں نے اعلان کیا تھا کہ ان سے کیے جانے والے وعدے پورے ہوں گے۔
عامر لیاقت نے خیبر پختونخوا کے حالیہ بلدیاتی الیکشن کے نتائج کا حوالہ دیتے ہوئے کہا کہ مولانا پورے کے پورے خیبر پختونخوا میں "صاف شفاف" انتخابات میں جیت گئے۔
خیال رہے کہ خیبر پختونخوا کے 17 اضلاع میں ہونے والے بلدیاتی الیکشن میں مولانا فضل الرحمان کی پارٹی جمعیت علماء اسلام تحصیل کونسل اور سٹی میئرز کی 64 میں سے 21 نشستوں پر کامیابی کے ساتھ سرِ فہرست ہے۔ اب تک موصول ہونے والے 58 نشستوں کے نتائج کے مطابق حکمران جماعت تحریک انصاف 14 نشستوں پر کامیابی حاصل کرپائی ہے۔
یاد ہوگا !
“ایک تھامولانا کادھرنااور دھرنے میں تھے سیکڑوں اہل دیو بند لایک بریلوی بچہ اور اہل دیو بند کے بچوں کے بھی بچےپھراسی دوران “ایک ملاقات”ہوئی کسی سے فون پر بات ہوئی، ہم سے کیے گئے وعدے پورے ہوں گے اور مولانا پورے کے پورے خیبر پختونخواہ میں “صاف شفاف” انتخابات میں جیت گئے
— Aamir Liaquat Husain (@AamirLiaquat) December 21, 2021
