ٹی 20، عماد وسیم50 وکٹیں لینے والے آٹھویوں پاکستانی باؤلر
لاہور(سپورٹس رپورٹر) آل راؤنڈر عماد وسیم ٹی 20 کرکٹ میں 50 وکٹیں حاصل کرنے والے آٹھویں پاکستانی باؤلر بن گئے ہیں۔ بائیں ہاتھ کے 32 سالہ سپنر نے انگلینڈ کے خلاف دوسرے ٹی ٹونٹی میں دو وکٹیں حاصل کرکے اپنی وکٹوں کی نصف سنچری مکمل کی۔ انہوں نے اپنے پہلے دو اوورز میں جیسن رائے (10) اور ڈیوڈ ملان (1) کو آؤٹ کیا۔ عماد وسیم کی 50 وکٹیں 51 میچوں میں 23.06 کی اوسط اور 6.40 کی اکانومی ریٹ سے آئی ہیں۔وہ فاسٹ باؤلر سہیل تنویر سے صرف چار وکٹیں پیچھے ہیں جن کے پاس 54 ٹی ٹونٹی وکٹیں ہیں۔عماد وسیم کم سے کم 50 وکٹیں لینے والے پاکستانی باؤلروں میں بہترین اکانومی ریٹ کے لحاظ سے دوسرے نمبر پر ہیں۔ لیجنڈری سپنر سعید اجمل اس فہرست میں 6.36 کے اکانومی ریٹ کے ساتھ پہلے نمبر پر ہیں۔پاکستان کے لیے ٹی ٹونٹی کرکٹ میں سب سے زیادہ وکٹیں لینے کا اعزاز شاہد آفریدی کو حاصل ہے جنہوں نے 2006ء سے 2018ء کے دوران 99 میچز میں 98 وکٹیں حاصل کی تھیں۔
