نواز شریف ہی لندن فلیٹس کے اصل مالک ہیں،طاہرالقادری
لاہور(ایجوکیشن رپورٹر)پاکستان عوامی تحریک کے سربراہ ڈاکٹر محمد طاہرالقادری نے پارٹی کے سینئر رہنماؤں کے مشاورتی اجلاس میں گفتگو کرتے ہوئے کہا کہ نواز شریف کی کرپشن اور ماڈل ٹاؤن کیس میں طلبی کے فیصلے بلاتاخیر ہونے چاہئیں،کرپشن کیسز کو پری پول رگنگ سے جوڑنا بدنام زمانہ سازشی بیانیہ ہے، بنگلہ دیشی وزیراعظم بھی کرپشن پر جیل میں ہیں، نواز شریف کے جیل جانے سے کوئی قیامت نہیں ٹوٹے گی ،الیکشن کمیشن اور نگران وزیراعظم گورنر ہاؤسز کے سیاسی و انتخابی استعمال پر خاموش کیوں ہیں؟ کیا آئینی و ریاستی سربراہان کا ایک جماعت کی انتخابی مہم میں شریک ہونے سے فیئر اینڈ فری الیکشن کا ماحول متاثر نہیں ہورہا؟ٹیکس چوروں، قتل عام کے نامزد ملزمان اور کرپشن کیسز میں ٹرائل ہونے والوں کو الیکشن لڑنے کی اجازت مل گئی، کاغذات نامزدگی داخل اور منظور کرنے کے مراحل میں آئین کے آرٹیکل 63/62 نظرانداز ہوئے،ووٹرز کے ڈیٹا چوری کی رپورٹس پر ابہام دور کرنے کیلئے نگران وفاقی حکومت بلاتاخیر پالیسی جاری کرے، ووٹ کو عزت دو کا نعرہ لگانے والوں نے مخصوص نشستوں پر اہلخانہ کی جھولیاں بھریں، سٹریٹ ورکرز چاہیں توپولیٹیکل لارڈز کے خلاف عزت دومہم چلا سکتے ہیں، عوام لوڈشیڈنگ ختم کرنے کے جھوٹے دعوے کرنے والوں کا ووٹ سے محاسبہ کریں، کرپٹ اشرافیہ نے 5 سال میں مہنگائی، قرضے،لوڈشیڈنگ، روپے کی بے قدری اور کرپشن کے تحفے دئیے،انہوں نے کہا کہ نواز شریف لندن فلیٹس کے اصل مالک ہیں اور یہ جائیدادیں آف شور کمپنیوں اور بچوں کے نام پر خریدی گئیں، نواز شریف کی منی لانڈرنگ اور لوٹ مار کھلی کتاب کی طرح ہے، انہیں سزاؤں اور جیل جانے سے کوئی نہیں روک سکتا۔