سمارٹ فون پھٹنے سے ایک اور شخص ہلاک ،آپ بھی اپنا موبائل استعمال کرتے ہوئے یہ خطر ناک کام کرنے سے پرہیز کریں

سمارٹ فون پھٹنے سے ایک اور شخص ہلاک ،آپ بھی اپنا موبائل استعمال کرتے ہوئے یہ ...
سمارٹ فون پھٹنے سے ایک اور شخص ہلاک ،آپ بھی اپنا موبائل استعمال کرتے ہوئے یہ خطر ناک کام کرنے سے پرہیز کریں

  

کوالالمپور(ڈیلی پاکستان آن لائن )ملائیشیا میں چارجنگ کے دوران سمارٹ فون دھماکے سے پھٹ گیا جس کے نتیجے میں سرکاری کمپنی کا چیف ایگزیکٹیو آفیسر ہلاک ہوگیا۔ماہرین کا کہنا ہے کہ موبائل فون چارجنگ کے وقت استعمال کرنے سے پرہیز کریں ۔غیر ملکی خبر رساں ادارے کے مطابق سمارٹ فونز سے ہلاکت کا ایک اور افسوسناک واقعہ پیش آیا ہے۔

ملائیشیا میں چارجنگ کے دوران سمارٹ فون پھٹنے سے ایک شخص ہلاک ہوگیا۔ ہلاک شخص کی شناخت 45 سالہ نذرین حسن کے نام سے ہوئی جو وزارت خزانہ کے زیر انتظام ٹیکنالوجی میں سرمایہ کاری کرنے والی کمپنی کریڈل فنڈ کا سی ای او تھا۔پولیس کے مطابق نذرین کے پاس دو موبائل فون تھے تاہم یہ پتہ نہیں چلا کہ دونوں میں سے کس کمپنی کے فون سے یہ حادثہ پیش آیا کیونکہ واقعے کے وقت دونوں فون چارجنگ پر لگے تھے۔ابتدائی تحقیقات سے پتہ چلا کہ ایک فون دھماکے سے پھٹ گیا جس سے قالین نے آگ پکڑ لی جس نے تیزی سے دیکھتے ہی دیکھتے پورے کمرے کو اپنی لپیٹ میں لے لیا اور نذرین کو جان بچانے کا موقع بھی نہ مل سکا اور وہ زندہ جل کر ہلاک ہوگیا۔

ادھر لواحقین نے موقف اختیار کیا کہ نذرین کی موت آتشزدگی سے نہیں ہوئی بلکہ دھماکے سے پھٹنے والے سمارٹ فون کے دھاتی ٹکرے نذرین کے سر کے پچھلے حصے میں پیوست ہوگئے جس کے باعث آگ لگنے سے قبل ہی اس کی موت واقع ہوچکی تھی۔واقعے کی پوسٹ مارٹم رپورٹ بھی سامنے آئی ہے جس کے مطابق چارجنگ کے وقت نذرین موبائل فون کے قریب تھا، فون دھماکے سے پھٹا جس سے نذرین کو جان لیوا زخم لگے جس سے اس کی موت واقع ہوئی۔ مرحوم نے پسماندگان میں بیوہ اور تین بچے چھوڑے ہیں۔

مزید : سائنس اور ٹیکنالوجی